Ижкар+1 °C
30 -тӥ шуркынмон 2021 Пуксён
18+

Ижкарысь «Чебеляй» коллектив «образцовой» ним басьтӥз

  • 238
  • 0
Ижкар / Удмуртия
Ижкарысь «Чебеляй» коллектив «образцовой» ним басьтӥз
Туспуктэм: Григорий Фомин

Ижкарысь Кузебай Герд нимо йӧскалык гимназиысь калык эктонъя «Чебеляй» студия «Образцовой нылпи коллектив» ним басьтӥз. Со сярысь ивортодэтъя «Удмуртия» агентстволэн корреспондентэзлы коллективлэн кивалтӥсез Наталья Чиркова вераз.

Со мынам но пиналъёслэн тыршемзылы дунъет. Со сюлэмез шунтӥсь дунъет. Но со вакытэ ик со ним ми понна бадӟым кылкутон, малы ке шуоно адямиос милесьтым адӟем каро
Наталья Чиркова, калык эктонъя «Чебеляй» студилэн кивалтӥсез

«Чебеляй» та нимез кыкетӥзэ басьтӥз. Азьвыл 2017-тӥ арын сётӥзы, нош туэ сое зэматӥзы.

Наталья Чирковалэн кылъёсызъя, коллективе 7 аресысен кутскыса, 30 арессэс ортчыса но ветло. Оглом, студиын вить группа эктонъёсын выре.

Ми понна валтӥсез – удмурт калык эктон. Но ми палэнэ но потаны туж яратӥськом. <…> Эшъёсмы мукет финн-угор улосъёсын но вань, соин ик репертуарамы соослэн эктонъёссы но пыро - со эстон, карел, финн эктонъёс луыны быгато
Наталья Чиркова, калык эктонъя «Чебеляй» студилэн кивалтӥсез

Студиен кивалтӥсь тыршемзэс вылӥ дунъязы но нимзэс эшшо вить арлы юнматӥзы шуыса тау кариз но азьланяз но ужзэс рос-прос азинтозы шуыса оскытӥз.

Нялтас вераса, вылӥ быгатонлыкъёссы но пиналъёсты чеберлыкъя визьнодан уже мыло-кыдо пыриськемзы понна «Образцовой нылпи коллектив» нимез «Чебеляйлы» сяна, Удмуртиысь эшшо сизьым коллективлы сётӥзы. Соос пӧлын:

  • Воткаысь Нылпи творчествоя центрысь «Золушка» модая театр;
  • Воткаысь Нылпи творчествоя центрысь «Бригантина» пинал учкисьлэн театрез;
  • Сарапулысь «Точка» нылпи театр школа;
  • Ижкарысь Нылпи творчествоя дворецысь «МодаART» пластикая но костюмъя театр;
  • Ижкарысь Нылпиослы ватсаса тодон-валан сётонъя элькун центрысь «Розовый слон» эктонъя театр;
  • Ижкарысь 54 номеро школаысь ӟуч калык инструментъёсын шудонъя «Рябинушка» оркестр;
  • бигер крезьгуръя, кырӟанъя но эктонъя «Асылъяр» ансамбль.

Пусъём, нимез басьтон понна экспертъёслэн ӧриязы 12 куриськонъёс вуизы. Соос пӧлысь сизьымез нимзэс зэматыны куронэн.

Тодэ вайытом, Удмуртиысь ньыль театръёс коньдон юрттэт басьтозы. 



Наверх
Вниз