Ижкар+1 °C
21 -тӥ коньывуон 2021 Покчиарня
18+

Туала удмурт лулчеберетлы сӥзем книгалэсь кыкетӥ люкетсэ поттӥзы Эстониын

  • 326
  • 0
Таллин / Эстония
Туала удмурт лулчеберетлы сӥзем книгалэсь кыкетӥ люкетсэ поттӥзы Эстониын
Туспуктэм: vk.com (Николай Анисимов)

Эстониын Таллинысь университетлэн книгапоттоннияз «Туала удмурт лулчеберет» («Современная удмуртская культура») книгалэсь кыкетӥ люкетсэ поттӥзы. Со сярысь ивортодэтъя «Удмуртия» агентстволэн корреспондентэзлы одӥгез кылдытӥсез, Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтысь, Эстониысь литературая музейысь тодосчи, фольклорист Николай Анисимов вераз.

Книгаез люкан бордын кӧня ке ар ӵоже Николай Анисимов, Франциысь антрополог Ева Тулуз но Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтысь тодосчи Елена Попова тыршизы. Солэн нырысетӥ люкетэз 2020-тӥ арын потӥз. Нош туэ кыкетӥ люкетсэ но вуттӥзы.

Нырысь ик малпаськом вал, со одӥг уж потоз шуыса. Но, куке статьяос люкаськизы, бадӟым ужъёс, валамы соос трос луизы шуыса, но ваньзэ соосты пыртэммы потӥз, малы ке шуоно асьме туала удмурт культуралы сӥзем изданиос туж трос ӧвӧл на
Николай Анисимов, книгалэн одӥгез кылдытӥсез

Книга ӟуч кылын потӥз. Отчы Эстониысь, Франциысь, Удмуртиысь но Россиысь мукет улосвылъёсысь удмурт лулчеберетлэсь туала югдурзэ эскерисьёслэн ужъёссы пыризы. Соос пӧлын шаерысьтымы Николай Анисимов, Богдан Анфиногенов, Светлана Арекеева, Елена Булычева, Мария Векшина, Галина Глухова, Лара Дмитриева, Елена Ковычева, Вера Пантелеева, Юрий Перевозчиков, Елена Попова, Ирина Пчеловодова, Светлана Русских, Влад Степанов, Любовь Фёдорова, Александр Черных, Галина Шушакова.

Трос пӧртэм ӧръёс люкаськизы. Шуом, сям-йылолъёс сярысь. Кызьы соос туала арын азинтӥсько, кызьы соосты чаклало, утё. Озьы ик асьме туала удмурт дӥськут сярысь. Кыӵе формаен со утиське. Озьы ик крезьгур удысъя. Кызьы туала удмурт кырӟанъёс уло гуртын, карын, туала егитъёс пӧлын. Собере суредасьёслэн пӧртэм ӧръёссы
Николай Анисимов, книгалэн одӥгез кылдытӥсез

Николай Анисимовлэн верамезъя, Богдан Анфиногеновлэн туж тунсыко статьяез пӧрмиз. Со кыӵе туала удмурт крезьгуро ӧръёс вань эскериз. Кыӵе артистъёс, кыӵе кырӟанъёс кырӟало, кыӵе ӵектосъёс улонэ пыӵатӥсько, кыӵе соослэн кулэлыксы удмурт лулчеберет понна, кызьы соос сое азинто гожтӥз.

Мон верасал, асьме туала удмурт культура али туж зол азинске. Трос пӧртэм ӧръёс кылдо. Дунневыл культураен одӥг вамышен мыно. Со туж умой. Мон котьку но со понна, куке культуралэн, крезьгур ӧрлэн-а, тодослэн-а, пӧртэм турлы сюресъёсыз луо. Со культураез узырмытэ. Солэсь байлыксэ, кужымзэ, лэйкытлыксэ возьматэ
Николай Анисимов, книгалэн одӥгез кылдытӥсез

Азьланяз книгаез лыдӟетъюртъёсы вӧлмытыны ӧдъяло. 

Тодэ вайытом, Удмуртиысь книгапоттонни кык книга поттыны грантъёс утӥз



Наверх
Вниз