Ижкар+1 °C
9 -тӥ толсур 2021 Покчиарня
18+

Глазкарысь пединститутын дышетскись «Мисс студенчества Финно-Угрии» ним понна вожвылъяськоз

  • 281
  • 0
Глазкар / Удмуртия
Глазкарысь пединститутын дышетскись «Мисс студенчества Финно-Угрии» ним понна вожвылъяськоз
Туспуктэм: vk.com (ГГПИ им. Короленко)

Глазкарысь дышетӥсьёсты дасясь В. Г. Короленко нимо кун институтысь историяя но лингвистикая факультетын витетӥ курсын дышетскись Ксения Богданова «Мисс студенчества Финно-Угрии» калыккуспо вожвылъяськонэ пыриськоз. Ужрад Ханты-Мансийскын 7-11 толсуре ортчоз. Со сярысь Глазкарысь дышетсконнилэн «ВКонтакте» мерлыко вотэсысь огиназ ивортӥзы.

Ксения Богданова Дэбес черкогуртын вордӥськиз. Глазкарын англи но удмурт кылъёсъя дышетӥсьлы дышетске. Нылмурт котькытчы вутскыны тырше, огъяросси но, калыккуспо но ужрадъёсы вуылэ. Пичи дырысеныз хореографиен выре. Институтысь «Ромашка» центрысь калык эктонъя студие ветлэ. Нош 2020-тӥ арысен «Чайка» эктонъя коллективен кивалтэ.

Али Ксения командаеныз вожвылъяськонлы дасяське. Ваньзэ, мае быгатэ, марлы дышетскиз, возьматыны тыршоз шуыса пусъе.

Конкурслэн люкетъёсыз пӧртэмесь, котькудаз тужгес усто быгатонлыкъёсмес возьматыны кулэ. Мон эктонъёсын вырисько бере, творческой люкетаз ӵапак со жанрын ик асме возьматыны ӧдъясько, со мон понна тужгес тунсыкоез но сюлмаськытӥсез луэ. <…> Дасяськыкум пӧртэм ӧнерчиос, эшъёсы, ӵыжы-выжыосы доры вазиськоно луисько. Соослэн усьтэм сюлэмо, юрттыны дась луэмзы мыным мылкыд сёто
Ксения Богданова, Глазкарысь пединститутын дышетскись

Пусъём, туэ «Мисс студенчества Финно-Угрии» вожвылъяськон «Вековые традиции – креативные горизонты!» темалы сӥземын луоз. Со кӧня ке люкетъёсын ортчоз: пресс-конференция, «Ремёсла финно-угорских народов: творим с креативом» мастер-класс, «ЭтноОбъектив: взор прошлого – взгляд в будущее» конкурс, «Путешестую по Финно-Угрии!» видеоконкурс, устолыкъя «Красота народа – во всём!» конкурс но йылпумъясь дефиле. 

Туэ Ксения Богданова Удмуртилэн Кун Кенешезлэсь нимъем премиоссэ басьтӥсь 20 студентъёс пӧлы пыриз

Тодэ вайытом, 2020-тӥ арын «Мисс студенчества Финно-Угрии» вожвылъяськон Удмуртиын луыны кулэ вал, но коронавирусъя югдур умойтэмен сэрен конкурсэз ӧз ортчытэ. 



Наверх
Вниз