Йӧскалык дэремлэсь нуналзэ ортчытозы Анай кыллэн калыккуспо нуналаз Пичи Пургаын

Йӧскалык дэремлэсь нуналзэ ортчытозы Анай кыллэн калыккуспо нуналаз, 21-тӥ тулыспалэ, Пичи Пургаын. Туэ ужрад куинетӥзэ радъяськоз ини. Со сярысь иворъёсъя «Удмуртия» агентстволы вераз «Удмурт Кенеш» огазеяськонлэн Пичи Пурга ёросысь ёзэтэзлэн тӧроез Василий Москвин.

«Кылем арын ми сое (ужрадэз — ред.) шунытгес дыръя ортчытӥм вал ини, оштолэзе. Ураметӥ но ортчыны мед быгатозы шуыса. Нош туэ туж трос ужрадъёс бере, юромо дыр висъянтэм понна Анай кыллэн нуналаз карим. <…> Мукет ёросъёс но мед кыстӥськозы вал. Собере со элькунын вӧлмысалыз ке, азьланяз ӵектос но гожъясалмы», — валэктӥз Василий Москвин.

Та ужрадэ котькуд мылкыд карись, котькуд коллектив пыриськыны быгатэ: школаос, нылпи садъёс, ужъюртъёс, предприятиос. Кылсярысь, кылем арын йӧскалык дӥсьёсын «пиштӥзы» администрациын ужасьёс, ёрос тӧро но пӧлазы, лулчеберет удысын, школаосын, нылпи садъёсын, редакциын, ужбергатӥсьёс дорын но почта ёзэтын тыршисьёс. 

«Соос уг дӥсяло кинлэсь ке курем, клубъёсысь басьтэм дэремъёсты, котькудӥз дӥся аслэсьтыз кельшись дэремзэ. Удмуртсэ гинэ уг, ӟучез — ӟучсэ, бигерез — бигерзэ», — шуиз «Удмурт Кенешлэн» ёрос ёзэтэзлэн кивалтӥсез.

Василий Москвинлэн верамезъя, Анай кыллэн нуналаз та ужрад адямилы аслэсьтыз кин луэмзэ возьматыны юрттоз. Кылсярысь, кызьы вераны мон бигер шуыса, бигер кылын вераськыны кулэлыкез ӧвӧл ке. Нош йӧскалык дӥсь дӥсяса, ваньмыз кылъёстэк но адӟиське. Озьы ик ӟучъёс но, удмуртъёс но.

«Али ик дасясько ини. Дэремъёс понна сюлмасько, дӥсьёссэс выльдо, кылем арын кадь ик дэремен медаз луэ шуыса», — вераз Москвин.

Озьы ик со пусйиз, та ужрадэ косэмъя пыриськыны кулэ ӧвӧл. Ас мылкыдъя. Йӧскалык дӥськутэн пӧрмытскемъёсты уз но данъялэ, уз но пусъе. Со аслэсьтыд аспӧртэмлыктэ, со сяна, мода возьматон.