Ижкар-12 °C
7 -тӥ южтолэзь 2021 Воскресенье
18+

Мисс Эктоника — 2017: вормыны юрттӥз эктон

  • 783
  • 0
Ижкар / Удмуртия
Мисс Эктоника — 2017: вормыны юрттӥз эктон
Фото: vk.com ("Эктоника")

«Мисс Эктоника — 2017» нимтулэз утӥз Кияса ёросысь Ермолаево черкогуртысь нылаш Алёна Леонтьева. Озьы ик со «Тыпыртоника» ним басьтӥз. Иворъёсъя «Удмуртия» агентстволэн корреспондентэз вормисен тодматскиз но кӧня ке юанъёс сётӥз.

Алёналы 18 арес, со Лулчеберетъя удмурт элькун колледжын 3-тӥ курсын дышетске. Кырӟа, эктэ. Вормоз шуыса со азьвыл ик шӧдэ вылэм ини.

«Мон юн оски вормо шуыса. Мынам дышетсконэ герӟаськемын творчествоен, со ик юрттӥз мыным вормыны. Туж шумпотӥ вормонэлы, одӥг но уг жаляськы конкурсэ пыриськеме сярысь, малы ке шуоно мон вал достойна! Вань эскеронъёс мыным кельшизы. Тау бадӟым радъясьёслы но жюрилы», — вераз со.

Тужгес но тодаз кылем эктон конкурс.

«Тунсыко вал нылъёсын ӵош эктыны. Малы ке шуоно эктонын вал милям асьмелэн импровизациямы. Творческой номерын мон эктӥ удмурт эктон но «Тыпыртоника» нимез утӥ на», — пусйиз Мисс Эктоника.

Азьланяз «Эктоника» ӵектосэн кыӵе кусып возёзы нылаш уг на тоды. Но ужрадъёсазы ӧтизы ке, одно ик мылысь-кыдысь пыриськоз шуыса мылкыдзэ вера.

Вераны кулэ, талэсь азьло, 2017-тӥ арын ик, Алёна Леонтьева Кияса ёросын «Коса — девичья краса» вожвылъяськонэ пыриськем вылэм ни. Отын со «Мисс Кокетка» нимез утэм.

Тодэ вайытом, «Мисс Эктоника — 2017» вожвылъяськон Ижкарын 17-тӥ южтолэзе ортчиз. Йылпумъян люкетаз 5 удмурт нылашъёс пыриськизы.



Наверх
Вниз