Ижкар-1 °C
27 -тӥ шуркынмон 2021 Кӧснунал
18+

Удмуртиын улӥсь калыкъёслэн выжыкылъёссыя нылпи фестиваль кутскиз элькунын

  • 595
  • 0
Ижкар / Удмуртия
Удмуртиын улӥсь калыкъёслэн выжыкылъёссыя нылпи фестиваль кутскиз элькунын
Фото: vk.com (Удмурт нылкышно кенеш)

«Удмурт нылкышно кенеш» огазеяськонлэн кичӧлтэмезъя элькунысь каръёсын но ёрос центръёсын «Выжы-выжы-выжыкыл» нылпи фестиваль ортче. Шоркарын нырысетӥез ужрад туннэ, 11-тӥ куартолэзе, ортчиз. Со сярысь ивортэ Калыкъёслэн эшъяськон юртсылэн пресс-службаез.

Фестивале пырисько удмурт кылэз, йылолъёсты дышетӥсь нылпи садъёс. Отчы ветлӥсь пиналъёс Удмуртиын улӥсь калыкъёслэн выжыкылъёссыя удмурт кылын возьматонъёс дасяло. Ужрад Удмуртиын улӥсь калыкъёслэсь йылолъёссэс тодон но элькунысь нылпи садъёсы удмурт кылэз пыртонын выль амалъёсты вӧлмытон вылысь радъяське.

«Ми шумпотӥськомы, фестивальмы пумен паськыт луэ шуыса. Таяз арын Ижкарын гинэ 25 нылпи садъёс пыриськыны мылкыд каризы. Ми соос понна семинар ортчытӥмы, репертуарез, крезьгурез, декорациосты дасянъя ӵектонъёс сётӥм. Пусйымон, унозэ выжыкылъёсты асьсэос визьнодасьёс берыкто — жаляса верано, удмурт кылын дась инсценировкаос туннэ туж ӧжыт», — «Удмурт нылкышно кенешлэн» тӧроезлэсь Надежда Степановлэсь кылъёссэ вера пресс-служба.

Таяз арын фестивалез ортчытонъя 12 площадкаос ужалозы, куинез со пӧлысь — Ижкарын.

«Выжы-выжы-выжыкыл» фестивальлэн йылпумъян люкетэз 19-тӥ куартолэзе Ижкарын Калыкъёслэн эшъяськон юртазы ортчоз.

Тодэ вайытом, 2016-тӥ арын фестиваль-вожвылъяськонэ 40 пала нылпи садъёс пыриськизы. Йылпумъян люкетаз Ижкарысь, Воткаысь, Глазовысь, но Можгаысь 7 нылпи садъёсысь коллективъёс пуктэм выжыкылъёссэс возьматӥзы.



Наверх
Вниз