Эгра ёросысь Сеп гуртын горд сюйлэсь арбериос лэсьтон киужез улӟытыны малпало

Эгра ёросысь Сеп гуртын горд сюйлэсь арбериос лэсьтон киужез улӟытыны чаклало. Малпанзэ улонэ пыӵатыны оско «Культурная мозаика малых городов и сёл» III Росси конкурсын вормисьёс пӧлы шедьыса. Иворъёсъя «Удмуртия» агентстволы со сярысь вераз Сепысь лулчеберетъя юртын ужась суредась Екатерина Романова.

Гуртысь лулчеберетъя юртлэн «Живая земля/Луло сюй» ӵектосэз Росси конкурслэн полуфиналаз потӥз. Вормисьёс 2017-тӥ арын 17-тӥ пӧсьтолэзе ялэмын луозы.

Екатерина Романовалэн верамезъя, горд сюйлэсь арбериос лэсьтон киужез улӟытыны малпан лыктӥз Бырем гуртъёслэсь музейзэс кылдытон улсын. Гуртъёслэсь историзэс эскерыса, лулчеберетъя юртын ужасьёс Троицкое гуртын улэм гончар Никандр Кулябин (вордскемын 1897-тӥ арын) сярысь тодӥзы.

Тодӥськом, улэ вал тодмо гончар Кулябин, со вань гуртъёслы горд сюйлэсь посуда лэсьтылӥз. 2 ведраем, 20 литр быдӟа, но ёмкостьёс лэсьтэ вылэм, чай парыны пичи чайникъёс но, тэркыос, кувшинъёс, котьма. Вань со посуда али но ветлэ на киысь кие, семьяын соосты возё. Соин ик милям кылдӥз малпан — дышетыны егитъёсты, пиналъёсты со гончарной ужлы

Вожвылъяськонын вормисьёслы тужгес троссэ 700 сюрс манет сёто, ӵектосэз кылдытӥсьёс сомында тыр ик ужъёсты чаклазы. Кулэ луозы гончарной кругъёс, посудаез ӵушканы гуръёс но мукетыз.

«Туристъёс тани лыктӥзы ке, Музей исчезнувших деревень милям усьтӥськиз ке, соос быгатозы оскалтыны, эскертыны, мар со сыӵе горд сюйлэсь (арбериос -ред.). Со бырем гуртъёсысь ик внукъёссы-а кин ке лыктозы, со горд сюй именно со гуртысь, кытысь сое азьло со мастер басьтэ вал, соос эскертозы, лэсьтозы асьсэ киын, со кылёз соослы синпель. Милям сюан обрядъёс ортчытӥськом. <…> Эшшо медӥськомы на, со горд сюен пӧрмиз ке, невестаен женихен — нылын, пиен — лэсьтозы асьсэлы посуда. Соослэн со нырысетӥез огъя посудазы луоз. Соослэн со быдэс улонзылы синпель луоз ни. Трос малпанъёсмы. Милям пинал инвалидмы вань, со ветлыны уг быгаты, нош пукыса со быгатысал лэсьтыны, киыз мынэ солэн. Солы со сюлмаз пыӵаз ке, со азьланяз но соин выроз, оло». — малпанъёссы сярысь вераз Екатерина Романова.

Тодэ вайытом, «Культурная мозаика малых городов и сёл» III Росси конкурслэн полуфиналаз озьы ик потӥз Эграысь шаертодонъя музейлэн «Дыханье старых стен» ӵектосэз.