100 лет государственности Удмуртии
Ижкар+12 °C
1 -тӥ инвожо 2020 Вордӥськон
16+

Москваын ортчоно Гербер шулдыръяськонлэн мереткылэз «Лэсьтэмын Удмуртиын» луоз

  • 561
  • 0
Москва / Россия
Москваын ортчоно Гербер шулдыръяськонлэн мереткылэз «Лэсьтэмын Удмуртиын» луоз
Туспуктэм: Михаил Шустов

1-тӥ пӧсьтолэзе Москваысь «Эрмитаж» садын ортчоно Гербер шулдыръяськонлэн мереткылэз (девизэз) «Лэсьтэмын Удмуртиын» луоз. Россилэн шоркараз улӥсьёс но куноос удмуртъёслэсь шудонъёссэс, эктонъёссэс но кырӟанъёссэс учкем сяна, Удмуртилэн туризмъя, инвестициосъя но экономикая луонлыкъёсыныз тодматскыны быгатозы, ивортэ элькунысь Калыкъёслэн эшъяськон юртсылэн пресс-службаез.

Удмурт йӧскалык праздник Россилэн шоркараз куинетӥзэ ортчоз ни. Шулдыръяськон, улосвылэн тодматон 10 часысен 21 часозь мыноз.

«Таяз арын Москваын Гербер выль сямен ортчоз. Москваын улӥсьёс но куноос Удмуртия сярысь,  мар лэсьтӥське асьме улосвылын рос-прос мед тодозы. «Лэсьтэмын Удмуртиын» — праздниклэн валтӥсь мереткылэз луоз. «Гербер» улсын калыккуспо гроссмейстерен но нимысьтыз ӧтем куноосын шахматэн шудон ортчоз. Кылсярысь, отчы пыриськыны соглаш луэмез сярысь вераз ни Росси Федерацилэн Кун Думаысьтыз лулчеберетъя комитетлэн тӧроез Станислав Говорухин», — Удмурт Элькунлэн тӧроезлэн Росси азьмурт бордын ялан ужась ыстэм муртэзлэсь ужоскетъёссэ огдырлы быдэсъясь Михаил Хомичлэсь кылъёссэ вера пресс-служба.

Улосвыллэсь промышленностья луонлыкъёссэ возьматозы «LADA Ижевск» но «Калашников» концерн. Россиысь автопромлэн берло азинсконъёсыныз тодматскыны луоз автомобильёсты адӟытонын. Ыбылӥськон тӥрлыкез поттон удысын азьветлӥсьлэн стендэз дорын куноосты тодмо ожтӥрлыкен вырыны дышетозы. Со сяна, празднике лыктэмъёс Удмуртиын поттэм дронъёсын-беспилотникъёсын тодматскыны, соосын кивалтыны эскерыны быгатозы.

«Удмуртилэсь шӧмзэ» усьтозы фермеръёс. Соос асьсэлэсь вузъёссэс возьматозы но йӧскалык сиён-юонэн (перепечен но пельнянен) утялтозы.

Киужъёсын тунсыкъяськисьёс пӧртэм мастер-классъёсы пыриськыны быгатозы. Пинал куноосты шулдыртозы удмурт выжыкылъёсысь геройёс Тол Бабай но Лӧпшо Педунь. Сцена вылэ потозы Удмуртиысь кырӟанъя но эктонъя тодмо коллективъёс. Шулдыръяськонэ лыктэмъёсты улосвыллэсь пуссэ кылдытон флешмоб огазеялоз, сое лобась дрон снимать кароз.

Праздник пумын элькунысь устоосаз санаторийёсы путёвкаос утыны луоз. Ӝытэз йылпумъялоз этно-дискотека.

Москваын улӥсьёсты но куноосты Гербер шулдыръяськонэ ӧтёзы бадӟым ялонъёс. Яркыт постеръёсты дасяз «Монами» удмурт дизайн-мастерской. Солэн кивалтӥсез Андрей Соловьёв верамъя, соосты кылдытон бордын Удмуртилэн Постпердствоысьтыз ӧнерчиосын ӵош ужазы.

«Удмуртия сярысь тужгес тодмо но кельшымон фактъёсты бырйимы, собере макетъёс лэсьтӥмы. Мон сямен, соос туж кельшымон, но «верась» пӧрмизы», — вераз иворъёсъя «Удмуртия» агентстволы Андрей Соловьёв.

Кызьы веразы иворъёсъя «Удмуртия» агентстволы Удмуртилэн тӧроезлэн Росси азьмурт бордысь ужась постпредствояз, оглом 60 постеръёс но билбордъёс лэсьтэмын. Быдӟалазыя 1760×1160, но 6000×3000.

"Гербер" ӧтёнъёслэн макетъёссы
                                                                                                                     Фото: vk.com (МОНАМИ удмурт дизайн-мастерской ) ©

Москваын Герберлэн ужанрадлыкез:

10.00 — шулдыръяськонлэн кутсконэз

12.00 — шахматэн шудонъя вожвылъяськонэз усьтон

13.00 — «Гербер» праздникез сӥё-дано усьтон. Люкаськем калыклы вазиськозы Удмуртилэн тӧроезлэсь ужзэ огдырлы быдэсъясь но дано куноос

15.00–17.00 — лекторийёслэн ужан дырзы

19.00 — улосвыллэсь пуссэ кылдытон флешмоб

21.00 — праздникез ворсан.

ВАТСАН

Гербер — удмуртъёслэн тулыс бусы ужъёсты йылпумъянлы сӥзем вашкала праздниксы. Со инвожо пумын — пӧсьтолэзь кутсконын ортчытӥське. Калык веранъёсъя, та дырысен музъем «секытэн» лыдъяське, сое герыен яке лопатаен исаны уг яра. Ӵемысьгес со шунды берытскон вакытэн тупа. Вашкала дырысен удмуртъёс Герберын инмаръёслы вӧсясько. Соос куро «одӥг кидысысь 30 шеп мед будоз, выжыез зарни мед луоз, бусымес коньы котыртыны медаз быгаты».

Тодэ вайытом, Ижкарын Герберез 12-тӥ инвожое пусъёзы. Элькун шулдыръяськон Можга ёросын 17-тӥ инвожое ортчоз.



Наверх
Вниз