Ижкар+27 °C
12 -тӥ пӧсьтолэзь 2020 Воскресенье
16+

«Удмуртия» издательстволэн куинь книгаосыз Росси вожвылъяськонъёсын вормисьёс пӧлы шедизы

  • 439
  • 0
Ижкар / Удмуртия
«Удмуртия» издательстволэн куинь книгаосыз Росси вожвылъяськонъёсын вормисьёс пӧлы шедизы
Туспуктэм: Майя Бывальцева

«Удмуртия» издательстволэн куинь книгаосыз Росси вожвылъяськонъёслэн вормисьёсыз пӧлы шедизы. Данъетъёсты Москваын «Красная площадь» книга фестиваль улсын сётӥзы. Иворъёсъя «Удмуртия» агентстволы со сярысь вераз ужъюртлэн кивалтӥсез Юрий Кузнецов.

«Удмуртские народные мифы и легенды» книга (кылдытӥсез Надежда Кралина) Россиысь книга поттӥсьёслэн ассоциацизылэн «Россиысь устоосыз книгаос» конкурсаз «Лучшее издание, вносящее вклад в диалог культур» номинациын устоосыз пӧлы пыриз. Со сяна, издательстволы таукаронзэ сётӥз Россиысь Кунсьӧр ужъёсъя министерстволэн ЮНЕСКОен ужась ӧриез. Юрий Кузнецовлэн верамезъя, таӵе данъетэз соос гинэ басьтӥзы.

Эшшо кыкез книгаоссы Печатья но калыке ивортодэт вӧлмытонъя федерал агентстволэн «Малая Родина» конкурсаз пусъемын. «Я живу в Удмуртии» - «Увлекательное краеведение» номинациын но «Сарапул. Жемчужина камского берега» - «Образ родины» номинациын. Кыксэ ик кылдытӥз издательстволэн валтӥсь редакторез Георгий Грязев.

«Ми лӧптэмын, шумпотэмын, ужмес озьы дунъязы, синйылтӥзы шуыса. Вуоно конкурслы, вуоно арлы, таляк (трос) малпанъёсмы. Малпаськом, соосыз ми быдэстом но талэсь ӧжыт чебер книгаос ум поттэ шуыса», — пусйиз «Удмуртия» издательстволэн кивалтӥсез.

Майя Бывальцева
«Удмуртия» издательстволэн данъетъёсыз                                                                       Фото: Майя Бывальцева © udmurt.media

«Красная площадь» книга фестиваль Москваын 3–6 инвожое ортчиз. «Удмуртия» издательство туэ отчы кыкетӥзэ пыриськиз. Юрий Кузнецовлэн верамезъя, йӧскалык издательствоослы «со сяна, Москвае сюрес но ӧвӧл кадь ини», мукет фестивальёсы но адӟытонъёсы пыриськон дуно усе. Нош сыӵе ужрадъёсы ветлон туж кулэ но пайдаё луэ. Росси вожвылъяськонъёсын пусъем книгаоссэс кылдытон малпан но ӵапак отын кылдэм.

«Кылсярысь, кыӵе быръёно форматъёс, кыӵе форматъёсты али адями пусъегес-а, мар-а шуом. Малы ке шуоно дуногес-а, мар-а пӧрме шуыса, ми пичигес, дунтэмгес форматъёсты кутыны тыршиськомы вал. Но туала вакытэ ми асьме понна ужпум басьтӥмы — табере бадӟымгес форматъёсын ужано, жаляно ӧвӧл, шуом, зарнизэ но вылаз, азвесьсэ но. Со кутэм ужпуммы ачиз ассэ оправдать кариз, тани емышъёсыз но вань», — пусйиз Юрий Кузнецов.

Фото: Майя Бывальцева
Издательство бадӟым форматъёс вылэ потӥз                                                                   Фото: Майя Бывальцева © udmurt.media

Нялтас вераса, Удмуртиысь книга поттӥсьёс фестивале выль ӧр пыртӥзы шуыны луоз.

«Удмурт делегация гинэ йӧскалык дӥсьёсын сылӥз фестивальын. Нош туэ, милесьтым адӟем карыса, бигеръёсыз но, чувашъёсыз но, башкиръёсыз но, кабардаез но, чеченъёсыз но, мукетъёсыз но, ваньмыз йӧскалык дӥсьёссэс сандыкысьтызы поттӥллям. Собере милям гинэ вал Эграын лэсьтэм чебер етӥн мунёос, туэ ваньмыз эшъёсмы мунёоссэс но, горд сюйлэсь но, пулэсь но, куролэсь но, кин маин быгатэм, сыӵеоссэс ваиллям ини. Табере малпаськом ини: маин меда вуоно аре соосты ваньзэсты паймытоно?», — серекъяса тодаз вае Юрий Кузнецов.



Наверх
Вниз