Ижкар+19 °C
14 -тӥ оштолэзь 2021 Вирнунал
18+

Туризмъя ужрадъёсын огъя календарь кылдытозы Удмуртиын

  • 488
  • 0
Ижкар / Удмуртия
Туризмъя ужрадъёсын огъя календарь кылдытозы Удмуртиын
Туспуктэм: Алёна Селезнёва

Удмуртиын туристъёслы тунсыко луыны быгатӥсь ужрадъёсын огъя календарь дасялозы. Улосвыллэн валтӥсь ӵектосъёсызлы сӥзем кенешонын 19-тӥ пӧсьтолэзе со сярысь вераз элькун тӧролэсь ужзэ огдырлы быдэсъясь Александр Бречалов.

«Кӧня ке дыр ортчыса, ми туризмъя ӧрез нимаз висъяломы, асьмелэн со ӧвӧл шуыны луэ, солы коньдон ӧз висъяськы, удыс ӧз азинскы. Ми вань муниципал кылдытэтъёслэн тӧроосынызы пуксёмы но ужрадъёсын огъя календарь лэсьтомы, огкадь медаз луы, но со дыре ки адямилы, нырысь ик Удмуртиын улӥсьлы, валамон мед луоз, кытчы мыныны вуоно кӧснуналэ… Кык нуналлы ворсаськомы но туризмъя асьме ужрадъёсын календарь бордын ужаломы», — вераз со.

Александр Бречаловлэн кылъёсызъя, со пӧртэм кулэяськонъёслы валэктон сётыны мед быгатоз — крезьгур, спорт, лулчеберет… Элькунын рок-фестиваль вань ни ке, озьыен, лэсьтыны кулэ калык гуръёсъя, джаз, классика крезьгуръя, пӧртэм нуналъёсы, арняысь арняе, лыдъя со. Озьы ик спортъя — гозы кысканысен велосипедэн ворттылонозь. Озьы, чакла улосвыл кивалтӥсь, элькунэ трос коньдон кылёз, кудзэ калык мукет интыосы мыныса быдтэ. Озьы ик со ужрадъёсты одӥг темая огъя туръёсы герӟаны кулэ. Кылсярысь Бречалов Дед Мороз но Тол Бабай доры ветлӥсьёслэсь лыдзэс вераз — Великий Устюге араз 1 миллион адями вуылэ, Шарканэ — 50 сюрс, нош асьме ӵектослэн пуштросэз «шӧдскымон узыргес».

«Асьмелэн миллион 500 сюрс адями улэ, ӧжытсэ 10 процентэз кунэтӥ но дуннеетӥ ветло. Малы адями кошке? <…> Соослы мар ке вылез кулэ… Но адямиос квадроциклэн ворттылыны мукет улосвылэ кошко ке, озьыен, ми ум быгатӥське со кулэяськонэз быдэстыны», — вераз Александр Бречалов.

Удмуртилэн тӧроезлэсь ужзэ быдэсъясь пусйиз, со муниципал ёросъёслы 10 ӵектосъёс дасяны ужпум пуктӥз шуыса — толэзяз одӥг ӵектос, нош каръёсын, солэн малпамезъя, сыӵе ӵектосъёс толэзяз кык луыны кулэ.



Наверх
Вниз