2 сюрс пала адямиез люказ Ижкарын «Виль» шулдыръяськон

Ижкарын «Виль» («Выль») шулдыръяськонэ 2 сюрс пала адями люкаськиз. Выль емышъёслы сӥзем сяме пыӵам ужрад 2-тӥ гудырикошконэ Кызьпу арамаын ортчиз.

«Шумпотымон, куке вань йӧслыкъёсысь адямиос выжы калыклэн куншетэз улын люкасько но та музъем вылын аръёсын пыӵам сямъёсты гажамзэс возьмато. <…> Кызьы уд лыкты та празднике?! Ӝукен сюдо, перепечен утялто! Ӟечкыласько тӥледыз, ӟеч кузёосты, та праздникен! Выль емышъёс кӧт тырмымон мед луозы, асьмелэн улонмы но азинлыко но ванё-буро мед луоз», — вазиськиз люкаськем калыклы карлэн тӧроез Юрий Тюрин.

Асьме калыкмылэн вашкала, но ялан улӥсь, выльдӥськонэз возьматӥсь праздникеныз ӟечкылаз но ог-огмылы юрттыса улыны, шудбур но тазалык сӥзиз Кун Думаысь депутат Алексей Загребин.

Ижкар думалэн тӧроез Олег Гарин удмурт лулчеберетъя «Дэмен» огазеяськонлы тау каремзэ вераз. Ӵапак со дэменлык кичӧлтэмъя 20 ар талэсь азьло Ижкарын «Виль» праздникез ортчытъяны кутскизы. «Туж умой, Удмуртиын вань шуыса сыӵе праздникъёс, кытын ми инкуазь-анаймылы выль емышъёс сётэмез понна тау карыны быгатӥськомы», — пусйиз со.

«Туннэ асьмеос пумитаськомы «Виль» праздникез, выль нуналэз. <…> Гажано эшъёс, туж бадӟым тӥледлы тау ужамды понна, туж бадӟым тау таӵе мыло-кыдо луэмды понна — быгатӥськоды ужаны но, ӵыдэтскыны но. Мон ваньдылы сӥзисько бадӟым тазалык, умой мылкыд, ӝӧк вылады котьку но мед луоз бадӟым колдыен нянь, котьку но мед луоз чечыды тэркыяды, котьку но мед луоз холодильникады выль сӥльды», — вераз Индустри ёрослэн тӧроез Любовь Зайцева.

14 фото

«Вашкала, шулдыр, емышо, туж ческыт» праздникен люкаськем калыкез ӟечкылаз Удмуртиысь йӧскалык политикая министрлэн нырысетӥ воштӥсез Павел Орлов. «Туэ ӟеч емышъёс басьтыны куазь туж ик ӧз юртты, но удмуртъёс котьку но висъяськылӥзы ужаны яратэменызы, соин ик оскисько, котькудӥзлэн ӝӧк вылаз но мурӝолаз варенняосыз но, сылалтӥськемъёсз но трос луозы», — сӥзиз со.

«Карын улыса но, татчы люкаськиськом ке, мылкыд кылдэ сыӵе, асьмеос котькудмы асьме гуртэ бертӥм шуыса. <…> Котькуд коркан выль пиналъёс мед вордӥськозы, выль кырӟанъёс мед чузъяськозы, но соин валче ноку но ум вунэтэ асьме удмурт калыклэсь сям-йылолъёсмес», — вераз «Удмурт Кенеш» огазеяськонлэн тӧроез Татьяна Ишматова.

Вашкала йылолъя, Ижкарысь вӧсясьёс Инмарлы ӟеч емышъёс понна тау каризы, ог-огмес валаса, тупаса улыны мылкыд но ужаны кужым сётыны курыса вазиськизы, озьы ик выль емышъёсты, ӝукез вӧсязы.

«Дэмен» огазеяськонлэн тӧроез Роман Дементьев верамъя, «Виль» шулдыръяськонлы чабей но йыды кеньыръёслэсь 750 килограмм ӝук пӧзьтэмын вал. Со сяна, отын ик гурын пыжем перепечез веръяны луиз.

Люкаськем калыкез шулдыртӥзы но шумпоттӥзы Михаила Ворончихин, Геннадий Ганьков, Геннадий Бекманов, Иван Котельников, Андрей Корнилов, Ижкарысь фольклор коллективъёс. Эктонъёс, шудонъёс ӝомыт луытозь кыстӥськизы. 

Тодэ вайытом, 5-тӥ гудырикошконэ Можгаысь Сюга шур дурын («Свет» профилакторий палан) выль емышъёслы сӥзем «Выль» элькун праздник ортчоз.