Удмурт егитъёслэн лулчеберетъя «ТЫСЬ!!!» фестивальзы ортчоз Можга ёросын

16+

19-тӥ гудырикошконэ Можга ёросысь Поршур черкогуртын удмурт егитъёслэн лулчеберетъя «ТЫСЬ!!!» фестивальзы ортчоз. Кызьы ивортӥз муниципал кылдытэтлэн администрациезлэн пресс-службаез, ужрадъёс лулчеберетъя юртын 17 часысен 22 часозь мынозы.

Фестивальлэн радлыказ удмурт кылын лыдӟонъёс, мода возьматон но концерт. Ужрадэ 14 аресысен 35 аресозь егитъёс пыриськыны быгато.

Лыдӟонъёс:

• «Ингож» бичетэн тодматон. Егитъёслы сизем «Кенеш» номерен тодматскон;
• Дарали Лели: верос;
• Евгений Александров: блогысь чуръёс;
• Мария Векшина: выль романъёсысь люкет
• Лариса Дмитриева (Йӧскалык библиотека, Ижкар): выль удмурт книгаосын тодматон

Мода:

• «Mademoiselle Oudmourte» — туала удмурт мода адӟытон;
• Дарали Лели (Ижкар) — «Гуль, яке лымшор удмурт тропикъёс» коллекция;
• Надежда Сапожникова (Можга) — туала удмурт дӥсь дизайн;
• Надежда Касаткина (Игра каргурт, ДДН) — уйпал удмурт мода.

Концерт:

• Dukes — выль альбомен тодматон;
• Пост-дукес — электрон ӵектос;
• ДэмДор — удмурт роклэн вуоноез;
• Вениамин Трофимов (ГынСапег) — удмурт рэп;
• Павел Александров — Shoner Paul, Liet International ӵошатсконэ пыриськем удмурт кырӟась (Кузон) / туала крезьгур но Татарстанысь бавлы удмуртъёслэн фольклорзы;
• Мария Гроздова (Можга) — «Элькуновидение» элькун вожвылъяськонлэн финалисткаез;
• МАЛЫМИ группа — удмурт панк;
• dj Igi.

Тодэ вайытом, удмурт егитъёслэн лулчеберетъя «Тысь» фестивальзы 13-тӥ инвожое Ижкарын туж умоен ортчиз.