«Элькуновидение» пыриськон вылысь куриськонъёсты кутыны кутскизы

Удмурт кырӟанъя «Элькуновидение-2017» вожвылъяськонэ куриськонъёсты кутыны кутскизы. Ужрадэ Удмуртиысь сяна, бускель улосвылъёсысь но артистъёс пыриськыны быгато. Иворъёсъя «Удмуртия» агентстволы со сярысь вераз конкурсэз радъясьёслэн ыстэм муртсы Светлана Пикулева.

Вожвылъяськонэ пыриськыны вазиськонъёсты кутон 30-тӥ куарусёнозь кыстӥськоз.

Коньывуон толэзьлэн нырысетӥ шутэтскон нуналъёсаз радъяськоз быръён люкетэз. Со пыр потэмъёс быгатонлыкъёссэс возьматозы конкурслэн валтӥсь люкетаз. Со ортчоз 21-тӥ коньывуонэ «Аксион» культура дворецын. Устоосыз пыриськозы «Элькуновиденилэн» йылпумъян люкетаз. Со радъяськоз 4-тӥ шуркынмонэ, «Мынам Удмуртие» телеканаллэн меӵак эфираз

Удмурт кырӟанъя вожвылъяськонэз «Мынам Удмуртие» телерадиокомпания «Удмурт кенеш» огазеяськонэн ӵош ортчытэ. Ужрад «Евровидение» конкурс сямен радъяське — котькуд ёрос отчы одӥг гинэ кырӟасез келя. «Элькуновидение» пыриськыны луэ «Мынам Удмуртие» радио пыр азьвыл чузъяськымтэ кырӟанэн. Сое быдэстӥсь, кылъёслэн но крезьгурлэн авторзы одӥг ёросын вордскемын луыны кулэ. Озьы «Элькуновидение» ёросъёс куспын творчествоя вожвылъяськонлы пӧрме, верало радъясьёсыз.

«Котьку сямен, конкурслэн кӧня ке вормисьёсыз луозы. Валтӥсь кузьымез утӥсь сяна, шараямын луозы кырӟанлы тужгес усто кылбурлэн, но тужгес усто крезьгурлэн авторъёссы. Конкурсэ пыриськись котькуд артист вормисьёс радэ уг поты ке, но, кырӟанэз «Мынам Удмуртие» радиолэн фонотекаяз пырыны быгатэ. Туэ кырӟанъёсты дунъян радлык воштӥськыны быгатоз. Со сярысь матысь нуналъёсы ивортэмын луоз», — ватсаз Светлана Пикулева.

Таиз вожвылъяськон куатетӥез луоз ни. Тодэ вайытом, «Элькуновидение-2016» вожвылъяськонлэн концертаз дунъясьёс тужгес трос баллъёс сётӥзы Можга ёросысь «Кизилиед» кырӟанлы (быддэстӥз Мария Гроздова), но йылпумъян люкетаз тужгес трос куара люказ Пичи Пурга ёросысь «Аня» кырӟан (быдэстӥзы Игорь Петров, но Андрей Байсаров).

Ватсалом, иворъёсъя «Удмуртия» агентство «Элькуновидение-2017» вожвылъяськонлэн ивортодэт вӧлмытонъя юрттӥсез. Озьен, вань выль иворъёсты милям сайтысьтымы тодыны быгатоды.