Ижкар-19 °C
26 -тӥ тулыспал 2021 Удмуртарня
18+

Быдэс дуннеын тодмо лейбл бесерманъёслэн но уйпал удмуртъёслэн крезьёсынызы диск поттоз

  • 793
  • 0
Ижкар / Удмуртия
Быдэс дуннеын тодмо лейбл бесерманъёслэн но уйпал удмуртъёслэн крезьёсынызы диск поттоз
Туспуктэм: vk.com (Евгения Лекомцева)

Быдэс дуннеын тодмо лейбл бесерманъёслэн но уйпал удмуртъёслэн крезьёсынызы диск поттоз. Кылем арня пумын Удмуртие Санкт-Петербургысь крезьгурчи, бесерманъёс сярысь документальной фильмлы крезьгур гожтӥсь Виктор Сологуб но Англиысь куарая режиссёр, быдэс дуннеын калык крезьгуръёсты гожъясь Ричард Чаппель вуылӥзы. Иворъёсъя «Удмуртия» агентстволы со сярысь вераз крезьёсты быдэстӥсь, Эстониысь крезьугъя но театръя академиысь докторант Мария Корепанова. Балезиноын вордскем но будэм нылмурт куноосты гуртъёсы келяса ветлӥз.

Нырысетӥ нуналаз, 19-тӥ числое, ми куинь бесерман гуртъёсын ужамы. Мон верай, крезьёсты бесерманъёс гинэ уг быдэсто, соос уйпал удмуртъёслэн но вань шуыса. Соос пӧртэмесь, но инъетэз одӥг — нимпровизация но трос куараен быдэстон. Удмуртие вуимы ни бере, мон Кез ёросэ но вуылоно шуыса малпай, отын ми ньыль гуртъёсын гожтӥмы. <…> Со вал улэп быдэстон. Кыкен, ньыль кузя кырӟазы, Сосновй Борын ансамбль вал, огназ песянай вал
Мария Корепанова

Ку дась луоз диск, али тодмо ӧвӧл на. Озьы ик валантэм, кыӵе пуштросэз солэн луоз.

«Со чик воштытэк потоз-а яке пичияк кыӵе ке ватсанъёс луозы-а. Дисклэн пуштросэз тодмо ӧвӧл на, но материал гожтэмын, со туж пӧртэм. Со ик кулэ вал куноосмылы, угось огвыллем материал луиз ке, со диск понна тунсыко уз луы», — пусйиз крезьёсты быдэстӥсь.

Бесермянские напевы
Виктор Сологуб но Ричард Чаппель крезьёсты гожтон дыръя Фото: Евгения Лекомцева ©

Кыӵе ке валан матысь дыре кылдыны быгатоз. Санкт-Петербургын бесерманъёс сярысь фильмен (режиссёрез Юлия Миронова) тодматон дыръя Мария Корепанова Виктор Сологубен пумиськыны малпа. «Соку кенешомы, малпаськомы, материалэз кылзомы, озьы кыӵе ке но учкет кылдоз, оло, мар лэсьтыны луоз», — ватсаз нылмурт.

Котьма ке но, крезьёсты гожтон — со йӧскалык лулчеберетэз утёнын туж бадӟым уж.

Финнъёс, эстонъёс лыкто ке, асьмеос ог-огмылы агай-вынъёс луиськомы, нош али тунсыкъяськон дунневыл, шуом, орбитае, потӥз. Мынам туж оскеме потэ, со та дырозь утем асьме вашкала гуръёсмес эшшо паськытгес возьматыны луонлык сётоз шуыса. Со выжыысь адямилы, со крезьёсты быдэстӥсьлы сямен, мон понна со кулэ но туж пусйымон учыр
Мария Корепанова

Бесерман но удмурт гуртъёсын пумиськонъёс дыръя со аслыз но выль крезьёсты гожтӥз. Соин ик ужамзы котыр ласянь пайдалыко луиз. 



Наверх
Вниз