Ижкар+9 °C
16 -тӥ куарусён 2021 Покчиарня
18+

Михаил Петровлэн венгер кылэ берыктэм «Вуж Мултан» романэныз тодматскон ортчиз Ижкарын

  • 715
  • 0
Ижкар / Удмуртия
Михаил Петровлэн венгер кылэ берыктэм «Вуж Мултан» романэныз тодматскон ортчиз Ижкарын
Туспуктэм: Наталья Еркешева

Толон, 20-тӥ куарусёнэ, Удмурт кун университетлэн лыдӟетъюртаз Михаил Петровлэн венгер кылэ берыктэм «Вуж Мултан» романэныз тодматскон ортчиз. Ужрадэ произведениез берыктӥсь мадьяр тодосчи Иван Хорват, писательлэн нылыз Ольга Белоус, университетысь дышетӥсьёс, студентъёс но мукетъёсыз пыриськизы.

Иван Хорват верамъя, Михаил Петров сярысь со тодӥз венгер тодосчи-филологлэсь Януш Пустоилэсь. Со ик «Вуж Мултан» романэз Тартуын туэ гудырикошконэ ортчем Финн-угор писательёслэн конгрессылы берыктыны дэмлаз. Берыктон уж кык ар пала кыстӥськиз. Тодосчиез нокин ӧз дыртыты, соин ик со гань-гань ужаз, куд-ог нуналъёсы тросгес берыктыса, куд-ог нуналъёсы — ӧжытгес.

Куке кутски лыдӟыны, романэн, писателен тодматскыны, монэ юнгес но юнгес тунсыкъятӥзы, куд-ог дыръя лулпушме ик вӧсь каризы ӝож люкетъёс, шимес учыръёс. Роман мыным туж кельшиз. Мон туж трос ужай, тырши берыктон бордын. Тани пӧсьтолэзе книга потӥз ини. Мон солы верантэм шумпотӥсько
Иван Хорват

Та романэз нырысьсэ берыктон ӧвӧл ни. Произведение пӧртэм аръёсы ӟуч, бигер, эстон, француз но мукет кылъёсы берыктэмын. Удмурт журналист, литературовед, гожъяськись, тодосчи но дышетӥсь Александр Шкляев верамъя, Германиын но вань тодосчи, кудӥз та темаен тунсыкъяське. Со эскере публикациосты, журналистикаез.

«Мон малпасько, трос калык, уката ик покчи калыкъёс асьме кунысь, со романэз лыдӟо но берыкто ас кылъёсазы, малы ке шуоно со туж дырызлы тупась луоз, малы ке шуоно котькуд калыклэн потэ ассэ выжыятэмез, со медам быры шуыса, сыӵе мылкыдын. Кызьы шуиськом, глобализация, со покчи калыкъёсты пачкатэ шуыны луоз <…> Мон малпасько берктӥзы но, берыкто но, берыктозы но трос пол со романэз, малы ке шуоно со пумтэм тема, малы ке шуоно со роман уте покчи калыкъёслэсь эрикрадзэс», — вера Александр Шкляев.

Тодосчиос сяна, Михаил Петровлэн творчествоеныз студентъёс но тунсыкъясько, курсовой ужъёс гожъяло. Классиклэн нылыз доры краеведъёс но ӵемысь вазисько. Ольга Белоус ивортэмъя, писательлэн архиваз трос калыклы тодмотэм материалъёсыз, соин ик Михаил Петровлэн творчествоез эскеремын ке но, трос вылез но тунсыкоез шеде на.

«Краеведъёс шедьтӥзы Михаил Петровичлэсь 1942–1945-тӥ аръёсы гожтэм азьвыл тодмотэм 26 гожтэтъёссэ. Отын шедизы тодмотэм кылбуръёс но <…> Школаын дышетскисьёс но шедьтӥзы гожтэт, кытын нырысетӥез Михаил Петровичлэн ӟуч кылын гожтэм тодмотэм кылбурез вал. Со сюриз котырес лыдпус тырмон аре, 2015-тӥ арын вал шедьтэмын», — шуэ Ольга Белоус.

Венгер кылэ берыктэм романэн тодматскон дыръя, произведение но чузъяськиз. Удмурт кун университетлэн дышетскисьёсыз ваёбыж сярысь люкетэз пӧртэм кылъёсын лыдӟизы. Йылпумъяса, Иван Хорват университетлы но лыдӟетъюртлы венгер кылэ берыктэм «Вуж Мултан» романэз кузьмаз.

Ватсалом, роман та выкытэ книга ӝажыосын ӧвӧл на. Венгер кылын «Вуж Мултан» Иван Хорват но Адями ванёс министерство (Министерство человеческих ресурсов) киын гинэ вань, малы ке шуоно романэз поттон понна со коньдон висъяз. Произведениез берыктӥсь малпамъя, матысь дыре роман книга вузаськонниосы но кылдоз.

СПРАВКА

Иван Хорват – ӟуч кылъя дышетӥсь, филолог, Лоран Этвёш нимо Будапешт университетлэн профессорез, Венгер тодос академилэн докторез. Туж умой ӟуч кылэз тодэ. 2000-тӥ аръёсы Россиын Венгрилэн Посольствояз нырысетӥ секретарь но Венгер Элькунлэн лулчеберетъя но тодос-иворъёсъя центрезлэн кивалтӥсезлэн воштӥсез луыса ужаз.


Наверх
Вниз