Ижкар-19 °C
26 -тӥ тулыспал 2021 Удмуртарня
18+

Грак ёросысь поръёслэн вӧсяськон арамазы синпелет инлык басьтыны быгатоз

  • 608
  • 0
Грак / Удмуртия
Грак ёросысь поръёслэн вӧсяськон арамазы синпелет инлык басьтыны быгатоз
Туспуктэм: finugor.ru

Грак ёросысь Пор Вожой (Мари-Возжай) гурт вӧзысь поръёслэн вӧсяськон арамазы улосвылын нырысетӥез энтологи синпелет луыны быгатоз. Сыӵе пумкылъян кутӥз элькунысь Лулчеберет кылёсбурез кун ласянь утёнъя агентство бордын ужась экспертъёслэн кенешсы, вераз иворъёсъя «Удмуртия» агентстволы удысэтлэн кивалтӥсез Юрий Перевозчиков.

Солэн кылъёсызъя, сяме пыремъя утён улэ басьто историен герӟаськем синпелетъёсты, таяз учырн экспертъёслэн кенешсы объектлэсь история но лулчеберет понна дунлыксэ пусйиз.

Объект историысь кыӵе ке учыръёсын герӟаськемын ӧвӧл, но со калыклэн этнографиез, пор общинаосты утён ласянь кулэ
Юрий Перевозчиков

Юрий Перевозчиковлэн верамезъя, улосвылын удмуртъёслэн но, бесерманъёслэн но вӧсяськон арамаоссы вань, но тросэз соос, жаляса верано, интынимъёс сямен гинэ кылемын, отын ортчытъям вӧсяськонъёс тодэ ваёнъёсын гинэ уло на. Катрадлык соосты этнологи синпелетъёс пӧлы пыртыны лэзе кичӧлтон сётэмъя. Пор Вожой вӧзысь арама пумысен Лулчеберет кылёсбурез кун ласянь утёнъя агентствое Удмуртиысь поръёслэн огазеяськонзы вазиськиз. Тодосъя эскеронъёс дыръя соос улосвылысь 10 сыӵе интыосты шараязы.

Куриськон вуэм бере объектлэсь историяя но лулчеберетъя дунлыксэ дунъян понна агентстволы 90 нунал сётэмын вал. Экспертъёслэн кенешсы пумкылъян кутэм бере 4-тӥ коньывуонэ арамаез шараям объектъёсын лыдметэ пыртӥзы. Табере ар ӵоже Агентство экспертизаез радъяны кулэ.

Арамаез утялтон но йылолэз возён понна гуртын улӥсьёс сюлмаськозы, нош удысэт арамаез утёнъя куронъёсты юнматоз — отын уг яра писпуосты кораны, гудӥськыны, ӵашетыны. Соосты тӥям понна административной но уголовной кылкутон чакламын.



Наверх
Вниз