Ижкар-4 °C
2 -тӥ толсур 2021 Покчиарня
18+

Татарстанысь финн-угор калыкъёслэн фестивалязы нимысьтыз ӧтем куноос луозы «Брангуртысь песянайёс»

  • 975
  • 0
Челны / Россия
Татарстанысь финн-угор калыкъёслэн фестивалязы нимысьтыз ӧтем куноос луозы «Брангуртысь песянайёс»
Туспуктэм: Григорий Фомин

Ӵуказе, 21-тӥ коньывуонэ, Челныын (Набережные Челны) Татарстанысь финн-угор калыкъёслэн фестивальзы ортчоз. Нимысьтыз ӧтем куноос луозы «Брангуртысь песянайёс». Иворъёсъя «Удмуртия» агентстволы со сярысь вераз Челныысь удмуртъёслэн мер огазеяськонзылэн кивалтӥсез Валентина Билык.

Ужрад карысь Органной зал азьысь площадьын ортчоз. Удмурт, пор но мордва калыкъёслэн творчествоя коллективъёссылэн возьматонъёссы сяна, отын ик пельнянь фестиваль радъяськоз.

Таяз арын финн-угор лулчеберетэз паськытгес возьматыны малпамы. Котьку сямен луоз концерт программа. Но площадьысь сцена котырын озьы ик ваньмыз берганы кулэ, соин ик пельнянь фестиваль луоз, угось пельнянь — финн-угор сиён. <…> Пельнянез оскалтом, вузалом, сиём
Валентина Билык, Челныысь удмуртъёслэн мер огазеяськонзылэн тӧроез

Озьы ик фестивальлэн тодметъёсыныз но финн-угор синпельёсты адӟытон-вузан луоз. Валентина Билык верамъя, финн-угор кузьымъёсты шедьтыны капчи вылымтэ.

«Финн-угор синпельёсты лэсьтӥсьёс карамы вылымтэ, кинлы гинэ ӧй вазиськы, ваньзы шуо солы кулэяськон ӧвӧл, со нокинлы но тунсыко ӧвӧл. Но азьланяз Удмурт Элькунысь, Марий Элысь, Мордовиысь (чеберлыко киуж лэсьтӥсьёсты — руд.) кыскомы, дыр, сыӵе вузъёс мед луозы», — пусйиз Челныысь удмуртъёслэн азьветлӥсьсы.

Татарстанын улӥсь финн-угор калыкъёслэн фестивальзы Челныын куинетӥзэ ортчоз ни. Валентина Билык верамъя, творчествоя коллективъёслэн ӵектосъёссылы дурбасьтонъя грантъёсын конкурсэ нырысетӥ куриськонэз со 2012-тӥ арын сётӥз вал. Юрттэт басьтыны быгатӥзы 2015-тӥ арын.

Нырысетӥ фестивальзы вашкала лулчеберетлы сӥземын вал.

«Милем валаны кулэ вал, вань на-а вашкала кырӟанъёсты удмурт, пор, мордва кылын кырӟась песянайёс, быгатозы-а соос лыктыны, тунсыко-а со соослы. Коллективъёс вазиськизы. Вань соослэн костюмъёссы но, вашкала кырӟанъёссы но. <…> Калыклы кельшиз, фестивальмес азьланьтыны малпамы», — вераз Валентина Билык.

Нош 2016-тӥ арын радъясьёс мукет ужпум пуктӥзы — вашкала йылолъёсты утёнын пересьёслэсь ужзэс азьланьтӥсь егитъёсты, пиналъёсты шараяны. Вазиськисьёс нош ик тырмыт люкаськизы. Озьы таяз арын фестивалез эшшо паськытгес радъяны, кырын люкаськыны малпазы. Валентина Билык верамъя, коллективъёслы капчи уз луы, дыр, угось соос пӧртэм арлыдъем, финн-угор кылъёсты тодӥсьтэм адямиосты но бордазы кысконо луозы.



Наверх
Вниз