Ижкар+9 °C
16 -тӥ куарусён 2021 Покчиарня
18+

Крезь но удмурт кырӟанъёс чузъяськизы Эстониын финн-угор калыкъёслэн фестивалязы

  • 973
  • 0
Таллин
Крезь но удмурт кырӟанъёс чузъяськизы Эстониын финн-угор калыкъёслэн фестивалязы
Туспуктэм: vk.com (Вероника Фёдорова)

17–22 коньывуонэ Эстониын финн-угор калыкъёслэн фестивальзы ортчиз. Отын Удмуртилэсь данзэ крезен шудӥсь Вероника Федорова но кырӟась но пыж крезен шудӥсь Валерия Фёдорова утизы.

Финн-угор калыкъёслы сӥзем фестиваль Эстониын кун праздник улсын радъяське. Ӵыжы-выжы финн-угор калыкъёслэн нуналзы татын котькуд ар коньывуонлэн куинетӥ арня нуналаз пусйиське, шуиз иворъёсъя «Удмуртия» агентстволы Вероника Фёдорова. Туэ ужрадэ Россиысь коми калык, поръёс, карелъёс, удмуртъёс, ханты но мансиос, мадьяръёс, финнъёс но эстонъёс пыриськизы.

Со нунал (Ӵыжы-выжы финн-угор калыкъёслэн нуналзы) соослэн туж зол пусйиське. Та фестивальлэн гала-концертэз та нуналэ луэ. Озьы ик ми адӟылӥмы урамын транспортъёс ветло финн-угор калыкъёслэсь куншетъёссэс ошылыса
Вероника Фёдорова

Крезьчи верамъя, фестивале мынон сярысь соос шуак Эстониын улӥсь удмурт эшезлэсь Павел Кутергинлэсь тодӥзы. Ужрадэ нырысь ик Шаркан ёросысь арганчиос мыныны кулэ вал, но берпуметӥ вакытэ соос ӧз быгатэ. Соин ик одӥг арня куспын Вероника но Валерия визаос лэсьтӥзы но малпамтэ шорысь Эстоние мынӥзы.

«Мон крезья шудӥсь бере, мон тросгес крезен шудӥ, крезез возьматӥ <...> Эстонъёслэн вань крезь порма инструментсы, со шуиське каннель, соин соослы со туж тунсыко вал. Соос уг тодо вал крезь сярысь. Валерия Фёдорова шудӥз пыж крезен но кырӟаз. Озьы ик ми ӵошен кырӟаллямы но куинь кузя. Паша Кутергин шудӥз на гармошкаен», — ивортӥз Вероника Фёдорова.

Со сяна, ужрадэ пыриськисьёс школаосын дышетскисьёсты асьсэ калыкен но лулчеберетэнызы тодматӥзы. Озьы ик эктон ӝытъёс ортчылӥзы.

Котькуд калык аслэсьтыз эктонъёссэ возьматъяз. Ми туж капчи мылкыдо эктылӥм, пыриським со ужрадэ. <…> Озьы ик эктон ӝытъёсы ми удмурт эктонъёс возьматъямы
Вероника Фёдорова

Крезчи пусйиз, Эстониын туж зол удмурт диаспора шуыса. Таллинын но, Тартуын но удмуртъёслэн ансамбльёссы вань. Соос быгатонлыкъёссэс туж усто возьматӥзы, вераз Вероника Фёдорова.

Тодэ вайытом, ӵыжы-выжы финн-угор калыкъёслэн нуналъёсазы Удмуртиын «Палэзян» фестиваль ортчиз. Нош Татарстанысь финн-угор калыкъёслэн фестивалязы «Брангуртысь песянайёс» пыриськизы.



Наверх
Вниз