Ижкар-24 °C
6 -тӥ толсур 2021 Вордӥськон
18+

Алнаш литературалы сӥзем нуналъёс йылпумъяськизы Удмуртиын

  • 779
  • 0
Алнаш / Удмуртия
Алнаш литературалы сӥзем нуналъёс йылпумъяськизы Удмуртиын
Туспуктэм: Наталья Еркешева

Удмуртиын Алнаш литературалы сӥзем нуналъёс йылпумъяськизы. Туэ оштолэзьысен ӵектос улсын быдэс элькунын пӧртэм ужрадъёс ортчизы. 24-тӥ шуркынмонэ сӥё-дано ворсан ужрадэ ёросысь гожъяськисьёс, удмурт кылъя но литературая дышетӥсьёс, лыдӟетъюртъёсын но лулчеберетъя юртъёсын ужасьёс, литератураен тунсыкъяськисьёс но вань мылкыд карисьёс пыриськизы. Ӧтем куноос пӧлын Алнаш ёрослэн тӧроез Алексей Семёнов но Удмуртиысь Йӧскалык лыдӟетъюртлэн кивалтӥсез Татьяна Тенсина вал. Со сярысь ивортодэтъя «Удмуртия» агентстволы Алнаш ёросысь лыдӟётъюртъя шор сӧзнэтэзлэн кивалтӥсез Нина Николаева вераз.

Ми та ужрадын вераны тыршим сыӵе гожъяськисьёс, кылбурчиос сярысь, кудъёсыз туж тодмо милям ёросамы гинэ ӧвӧл, элькунамы но, элькун сьӧрын но, мукет кунъёсын но, мукет каръёсын но. Собере трос дыр ми висъям будӥсь пиналъёслы, кудъёсыз гожъясько
Нина Николаева

Лыдӟетъюртъя сӧзнэтлэн кивалтӥсез верамъя, Алнаш ёросын трос аръёс ӵоже ужа ни нылпиослы литературая «Ошмес син» огазеяськон. Отчы ветлӥсь пиналъёс та ужрадын асьсэлэсь кылбуръёссэс лыдӟизы. Со сяна, Герман Ходырев нимо литературая премилэн лауреатъёсыз но пыриськизы, кылсярысь, «Элькуновидение-2017» конкурслэн финалистэз Анастасия Иванова но егит кылбурчи Анна Бурдина. Нялтас вераса, удмурт кырӟанъя вожвылъяськонэ Анастасия «Мон гуртам куно гинэ» кырӟанзэ Анналэн кылбурезъя гожтӥз.

«Соиз туж умой, та ужрадын туж трос кылбуръёс чузъяськизы шуыса. Собере пӧртэм адямиос лыдӟизы: медицина удысын ужасьёс но, лулчеберет удысын ужасьёс но, администрациын ужасьёс но. Тӥни соиз туж но туж тунсыко вал», — пусйиз Нина Николаева.

Удмуртиысь муниципал кылдэтъёслэн литературазылы сӥзем нуналъёсты Можга ёрос азьланьтоз. Эстафетаез соослы Алнаш ёрослэн тӧроез Алексей Семёнов сётӥз. Можга ёросысь шор лыдӟетъюртлэн кивалтӥсез Светлана Сидорова ивортэмъя, ӵектос улсын соослэн бадӟым ужрадъёссы ортчозы.

Милям потоз тулыспалэ самодеятельной кылбурчиослэн бичетсы, «Пою о тебе, красавица Вала» шуыса нимаське. Ми со бичетэн тодматон ӝыт ортчытомы, ӧтьыса вань кылбурчиосты, кин пыремын со бичетэ. Кин пыремын но ӧвӧл, ӧтём одно ик
Светлана Сидорова

Можга ёросын арлы быдэ Игнатий Гавриловлы сӥзем лыдӟонъёс радъясько. Туэ ужрадэз паськытатозы — лыдӟонъёс Можга музъемын вордскем гожъяськисьёслы но кылбурчиослы сӥземын луозы, валэктӥз ёрос лыдӟетъюртлэн кивалтӥсез.

«Удмурт нылкышно кенеш» огазеяськон кичӧлтэмъя Ашальчи Окилы сӥзем сямлы пӧрмем лыдӟонъёс радъяськозы. Отын удмурт кылын гожъяськись нылкышноослэн кылбуръёссы чузъяськозы, вераз Светлана Сидорова.

Со сяна, Можга ёрос литературалэн нуналъёсыз улсын Трофим Архиповлэн творчествоезъя интернет-викторина ортчоз. Тодмо гожъяськись вордскем дырысен вуоно арын 110 ар тырмоз ни.

Та ужрадъёс борды Удмуртиысь Йӧскалык лыдӟетъюртэн но ёросысь гурт лыдӟетъюртъёсын дэмлам ужанрадлыкъёс ватсаськозы, шуиз Светлана Сидорова.

Тодэ вайытом, Удмуртиысь муниципал кылдэтъёслэн литературазылы сӥзем нуналъёс — элькунысь Йӧскалык лыдӟетъюртлэн ӵектосэз. Проект Удмуртиысь лулчеберетъя но туризмъя министерстволэн но элькунысь муниципал кылдэтъёслэн администрациоссылэн юрттэменызы улонэ пыӵатӥське.



Наверх
Вниз