Ижкар-24 °C
6 -тӥ толсур 2021 Вордӥськон
18+

Крезьгуръя дышетӥсь Екатерина Решетникова: удмурт кырӟанъёсты академ амалэн быдэстон понна бырйыны туж шуг

  • 487
  • 0
Ижкар / Удмуртия
Крезьгуръя дышетӥсь Екатерина Решетникова: удмурт кырӟанъёсты академ амалэн быдэстон понна бырйыны туж шуг
Туспуктэм: Екатерина Решетникова

Академ амалэн удмурт кырӟанъя «Жильыртӥсь кырӟан ошмес. Вунонтэм гуръёс» элькун вожвылъяськонэ Ижкарысь искусствоосъя 7 номеро школаысь куинь адями пыриськиз — крезьгуръя дышетӥсь Екатерина Решетникова но солэн дышетскисьёсыз Лия Бронникова но Рита Постникова. Кызьы вераз ивортодэтъя «Удмуртия» агентстволы Екатерина Решетникова, удмурт кырӟанъёсты академ амалэн быдэстонын тужгес шугез — со кырӟанэз быръён.

Кырӟанъёсын туж секыт, малы ке шуоно туж трос нотаос баянлы но аккордеонлы, нош фортепианолы ӟеч партитураос ӧвӧл. Соин ик кыӵе бичетъёс вань, отысь ик бырйим
Екатерина Решетникова

Екатерина Решетниковлэн верамезъя, удмурт кырӟанъёсты нылъёс асьсэ понна дышетӥзы, собере гинэ конкурс кылдӥз.

«Соос дышетско академ вокал ёзэтын, туэ йылпумъяло. Лия — со удмурт, анай-атаез удмуртъёс, Кизнер ёросысь. Со дышетске Йӧскалык гимназиын (Ижкарысь К.Герд нимо йӧскалык гимназиын — ред.). Рита — со ӟуч. Со кылӥз, Лия кырӟа шуыса но озьы ик удмурт кылын кырӟамез потӥз», — шуэ крезьгуръя дышетӥсь.

Вожвылъяськонэ нылашъёс мылысь-кыдысь пыриськизы. Та дырозь соос школалэн сцена вылаз гинэ потамын, нош асьсэлэсь кужымзэс палэнын но оскалтыны кулэ, лыдъя Екатерина Решетникова.

Мон малпасько, мылкыдзы вань ке, юрттоно, соин ик ми утчам но милям пӧрмиз. Кичӧлтон котьку нырысь ик дышетӥсьлэсь луэ. Утчаны кулэ. <…> Кулэ вал соосты сцена вылэ поттыны. Мон малпамъя, та умой вӧлмет вал
Екатерина Решетникова
 

Пусъёмы, ачиз Екатерина Решетникова вожвылъяськонын куинетӥ инты басьтӥз, Лия Бронникова Удмурт кун филармонилэсь кузьымзэ утӥз.

Тодэ вайытом, академ амалэн кырӟанъя «Жильыртӥсь кырӟан ошмес. Вунонтэм гуръёс» конкурс Удмуртиын 17-тӥ толсуре йылпумъяськиз. Со Удмуртиысь калык артистлэн, РСФСР-ысь дано артистлэн Григорий Титовлэн котырес лыдпусэзлы, 110 ар тырмонэзлы сӥземын вал. Билетъёс понна коньдонэз кырӟасез буре ваён пул кылдытонлы кутозы.



Наверх
Вниз