Ижкар+22 °C
11 -тӥ пӧсьтолэзь 2020 Кӧснунал
16+

Василий Ившинлэн гурт улон сярысь суредъёсыныз адӟытон усьтӥськиз Ижкарын

  • 402
  • 0
Ижкар / Удмуртия
Василий Ившинлэн гурт улон сярысь суредъёсыныз адӟытон усьтӥськиз Ижкарын
Туспуктэм: Наталья Еркешева

Туннэ, 12-тӥ толшоре, Ижкарысь адӟытонъёсъя «Галерея» центрын Дэбес ёросысь удмурт суредасьлэн Василий Ившинлэн «Тодэ ваён» адӟытонэз усьтӥськиз. Кызьы вераз суредась ивортодэтъя «Удмуртия» агентстволы, со ужъёссэ анай-атайёслы но гурт улонлы сӥзиз. 

Тодэ ваён — со котьку ӝожмыт. Ыштэм анай-атайёс сярысь, аслад улон аръёсыд сярысь, дыр сярысь, куке калык туж эшъяськыса улӥз. Ож бере озьы вал — ӵошен корка мисько вал, ӵошен пиналъёсты пырто вал, ӵошен сюанъёсын шулдыръясько. Тани сыӵе вал праздник, веме шуо, ку коркаез быдэсак мисько. Кыӵе ке шуг-секытъёсты но ӵош пумитало вал
Василий Ившин, суредась

Суредасьлэн кылъёсызъя, та ужъёсты егитъёслы возьматоно, мед соос ортчемзэ тодыса, азьлань мынозы шуыса. Ачиз Василий Ившин Дэбесысь политехникумын ужа бере, котькуд урокын со сярысь дышетскисьёсызлы тодазы вайытэ.

Атаезлэн сюресэзъя Василий Ившинлэн Алексей пиез но мынӥз. Со верамъя, атаезлэн суредъёсаз «суровая мужская доброта» шӧдӥське, соос музъемлы но калыклы матын. Алексей Ившин пусйиз, котькуд суредасьлэн вань вакытэз, куке солэн тужгес но трос, тужгес но устоесь суредъёсыз кылдо, нош атаез улонэз кузя ӵошкыт мынэ.

Мон солэсь ужъёссэ гажасько мур пуштросэз понна. <…> Татын котькуд ужез сярысь ӝыны часэн вераны луоз. Соосты йыртӥян шуыса учконо ӧвӧл, татын валтӥсез инкуазь но калыкез яратон но гажан
Алексей Ившин

Тросэз адӟытонэ лыктэмъёс чаклазы: суредась ужъёсаз пеймыт буёлъёс кутэ. Алексей Ившин валэктӥз, атаезлэн дунне шӧдэмез аспӧртэм шуыса, со Василий Ившинлэн пинал дыръёсыныз герӟаськемын. Нош али искусствоын мукетгес буёлъёс, озьы ке но суредась аслэсьтыз ӧрзэ уте.

Василий Ившинлэн суредъёсаз дышымтэ арбериос возьматэмын, паймизы куд-ог учкисьёс. Кылсярысь, одӥгаз натюрмортын курегпуз возён кассета суредамын. Эшшо одӥгез аспӧртэмлыкез: пейзажъёсты учкыса, астэ суредын возьматэм интыын кадь шӧдӥськод.

Василий Ившинлэсь «Тодэ ваён» адӟытонзэ усьтон

5 фото

«Тодэ ваён» адӟытонэ суредасьлэн азьвыл дышетскисьёсыз но лыктӥзы. Куд-огез соос пӧлысь чеберлыклы матысь удысъёсын ужа, мукетъёсыз ваньмем дыръязы суредаськонэн выро. Василий Ившинлэн одӥгез дышетскисез Александра Емельянова ӵапак «Галерея» адӟытон центрын ужа, суредаське но. Со верамъя, мукет суредасьлэсь ужъёссэ со ас сяменыз учке: одӥг ласянь — техниказэ чакла, мукет ласянь — аслэсьтыз мылкыдзэ.

«Мон учкисько, кызьы лэсьтэмын: кельше-а мазокез, уг-а. Кудъёсаз ке ужъёсын магнитизмез вань, сылӥськод соос дорын, учкиськод, нош пушкын мар ке но вордӥське», — шуиз Александра Емельянова.

Ватсалом, Василий Ившинлэн адӟытоназ пырем суредъёс 2016–2017-тӥ аръёсы гожтэмын. Усточилэн кылъёсызъя, котькудӥз туж ӝог суредамын — 40 минутысен часозь. «Тодэ ваён» адӟытон Ижкарысь «Галерея» центрын 28-тӥ толшорозь ужалоз.



Наверх
Вниз