Ижкар-24 °C
6 -тӥ толсур 2021 Вордӥськон
18+

Удмуртиын «Красавица в стиле ЭТНО» вожвылъяськонэ куриськонъёсты кутон мынэ

  • 814
  • 0
Дэри / Удмуртия
Удмуртиын «Красавица в стиле ЭТНО» вожвылъяськонэ куриськонъёсты кутон мынэ
Туспуктэм: Михаил Шустов

Удмуртиын «Красавица в стиле ЭТНО» конкурсэ куриськонъёсты кутон мынэ. Чеберлыкъя вожвылъяськон калык творчествоя «Окно в небо» калыккуспо фестиваль-конкурс улсын радъяське. Отчы Россиысь гинэ ӧвӧл, мукет кунъёсысь но 18–35 аресъем нылъёс но нылкышноос пыриськыны быгато. Со сярысь ивортӥз Дэри ёросысь егитъёслэн центрысьтызы ёзэтлэн кивалтӥсез Илья Ишмуратов.

Вожвылъяськонэ пыриськисьёс асьсэ калыксылэн выжыкылъёсысьтызы героиняос пӧрмытскыса потозы.

Чеберайёс понна ми онлайн-конкурсъёс дасямы, отын соос асьсэ вордскем музъемзы, кунзы, улосвылзы, йӧскалык йылолъёссы, озьы ик творчество удысын хоббизы сярысь вералозы
Илья Ишмуратов

Солэн верамезъя, та дырлы 6 куриськон вуэмын ни — Удмуртиысь, Башкириысь, Татарстанысь, Карелиысь, Алтай шаерысь но Африкаысь.

«Ужрад чебер, тунсыко но вунонтэм луыны кулэ. Конкурсэн Якутиысь, Алтай шаерысь, Тверьысь, Башкириысь, Тулаысь, Сербиысь, Испаниысь, Африкаысь, Казахстанысь, Венгриысь, Индиысь нылъёс тунсыкъясько ни», — пусйиз Илья Ишмуратов.

Ужрадлэн ужпумъёсыз пӧлын пӧртэм выжыысь но вӧсьлыкъёсысь калыкъёслэсь тупаса улонзэс юнматон, вожвылъяськонэ пыриськисьёсын но куноосын эшъяськон кусыпъёс тупатон но возён.

Дэри ёросысь егитъёслэн центрысьтызы ёзэтлэн кивалтӥсез озьы ик ватсаз, Фестиваль азьмуртлэн фондысьтыз грант утӥз шуыса, соин ик вожвылъяськонлэн финалаз потэмъёс татын дунтэк улыны быгатозы.

Куриськонъёсты тулыспал пумозь фестивальлэн нимлыко сайтаз куто.  

ВАТСАН

Калык творчествоя Д. К. Зеленин нимо укмысэтӥез «Окно в небо» калыккуспо фестиваль-конкурс тодмо ӟуч тодосчилэн, фольклористлэн Дмитрий Зеленинлэн вордскем шаераз Дэри ёросын 2018-тӥ арын 5–8 пӧсьтолэзе ортчоз. Ужрадлэн темаез: «Сказки разные — мудрость народная».


Наверх
Вниз