Ижкар+1 °C
13 -тӥ оштолэзь 2021 Пуксён
18+

Удмурт кылын чеберлыко литературая конкурсын вормисьёсты пусйизы Ижкарын

  • 784
  • 0
Ижкар / Удмуртия
Удмурт кылын чеберлыко литературая конкурсын вормисьёсты пусйизы Ижкарын
Туспуктэм: Николай Кузнецов

Туннэ, 19-тӥ толшоре, Ижкарын удмурт кылын чеберлыко литературая конкурсын вормисьёсты пусйизы. «2017-тӥ арын удмурт кылын тужгес кужмоез чеберлыко литература уж» вожвылъяськонэз Удмуртиысь печатья но калыке ивортодэт вӧлмытонъя агентство но «Кенеш» журнал радъязы.

Кылем ар ӵоже радъясьёслы Россилэн улосвылъёсысьтыз но кунгож сьӧрысь ог 100 пала ужъёс вуизы. Нимысьтыз жюри соосты эскериз но 10 тужгес кужмооссэ бырйиз. Конкурслэн куать номинациез пӧлысь ньыляз быдэн кык гожъясьёсты бырйизы, малы ке шуоно пусйымон ужъёс трос вал, вераз ивортодэтъя «Удмуртия» агентстволы «Кенеш» журналлэн валтӥсь редакторез Ольга Бородина.

Ӟечлыксыя, валамон, соос пӧртэмесь, но ӟеч ужъёс трос. Соин ик ми ньылзэ номинацимес люконо луим кык муртлы, малы ке шуоно висъяны уг луы ӟечлыксыя, пусъёно кадь ужъёс трос
Ольга Бородина

Кызьы шуиз элькунысь печатья но калыке ивортодэт вӧлмытонъя агентстволэн кивалтӥсез Алексей Воронцов, конкурс малпамлэсь умойгес ортчиз. 

«Кутскыкумы ик мон воштӥськонъёс пыртӥ, шуи, ойдолэ, удмурт кылэз вӧлмытон, утён но азинтон понна элькунлэсь палэнэ потом <…> Туж умой ужъёс Башкортостанысь, но Татарстанысь вуизы. Литературая вылӥ ӟечлыко ужъёс вуизы Дагестанысь, Мурманскысь, вуизы ужъёс Эстониысь», — ивортӥз Алексей Воронцов.

«2017-тӥ арын удмурт кылын тужгес кужмоез чеберлыко литература уж» вожвылъяськонын вормисьёс:

  • Тужгес умоез кузьмадёс — Мария Векшина но Елена Петрова (Дарали Лели)
  • Тужгес умоез верос, новелла, очерк, эссе — Николай Павлов
  • Тужгес умоез кылбур сузьет, поэма — Анастасия Шумилова но Елена Виноградова
  • Тужгес умоез пьеса — Василий Ушаков но Ульфат Бадретдинов
  • Нылпиослы тужгес умоез гожтос — Владимир Котков но Лия Малых
  • Критика но литературатодос удысъёсъя тужгес умоез уж — Вера Пантелеева

Котькуд номинациын вормисьёс коньдонкузьым басьтӥзы. Озьы ик соослэн ужъёссы «Кенеш» журналын печатласькозы. Со сяна, радъясьёс эшшо 20 авторез дунъязы — мед соос азьланяз но та вожвылъяськонэ мылысь-кыдысь пыриськозы шуыса, пусйиз Ольга Бородина.

Журналист но егит гожъясь Мария Векшина конкурсэ «Оӵ/ӧч кар» романэныз пыриськиз. Та уж нылашлэн нырысетӥ кузь произведениез. Авторлэн кылъёсызъя, со гожтӥз сыӵе роман, кыӵезэ солэн аслаз лыдӟемез потэ вал. Валтӥсь — героез егит нылаш, гожъяськись. Со улэ Оӵкарын, кытын туж трос редакциос но дано гожъясьёс ужало.

«Мон кылдытӥ сыӵе идеальной удмурт дунне, кытын гожъясьлы, одӥг ласянь, вань луонлыкъёс кылдытэмын азинскыны, гожъяськыны, книгаоссэ поттаны. Мукет ласянь, котькуд гожъясьлэн аслаз сюресэз. Со сюресаз солэн кыӵе ке но воштӥськонъёсыз луо, кыӵе ке но шугъяськонъёсыз. Куддыръя уг но пӧрмы гожтыны, кыӵе ке но кризис луэ. Вот со кризис сярысь ик вераськон мынэ та утопия дуннеын», — валэктӥз Мария Векшина.

Удмурт кылын чеберлыко литература ужъёсъя вожвылъяськонын вормисьёсты пусъён

7 фото

Вормисьёс пӧлын трос тодмо нимъёс. Одӥгез соос пӧлысь — Василий Ушаков — пусйиз, ужед шоры котьку палэнысен учконо, малпаськоно, мар шуысал гажано адями тынэсьтыд уждэ адӟыса.

Та нуналъёс, ку Кузебай Герд вордӥськем дырысен 120 ар тырме <…> Нош мар шуысал Герд «Кенеш» журнал сярысь? Мынам сыӵе капчи, умой мылкыды кылдӥз, Герд туннэ ужрадмылы, но ваньмызлы, мар лэсьтэ «Кенеш» журнал вань жанръёсын <…>, со шумпотысал, дыр
Василий Ушаков

Ватсалом, 2018-тӥ арын удмурт литературая вожвылъяськон азьланьтӥськоз. Туэ вормисьёс радъясьёслы «Удмурт кылысь ӟуч кылэ тужгес умоез берыктэм уж» номинация ватсаны ӵектӥзы.

Тодэ вайытом, та дыре Удмуртиын егит драматургъёслы «Выль пьеса, выль сценарий, выль сцена» вожвылъяськон мынэ. Ужъёсты кутон 1-тӥ южтолэзёзь кыстӥськоз



Наверх
Вниз