Ижкар+2 °C
26 -тӥ коньывуон 2021 Пуксён
18+

Бесерманъёс сярысь выль документальной фильмез возьматӥзы Ижкарын

  • 729
  • 0
Ижкар / Удмуртия
Бесерманъёс сярысь выль документальной фильмез возьматӥзы Ижкарын
Туспуктэм: facebook.com (Леонид Гонин)

29-тӥ толшоре Ижкарын бесерманъёс сярысь выль документальной фильмез возьматӥзы. «Нация» фильмен тодматскыны Удмурт кун университетлэн лыдӟетъюртаз лыктӥзы этнографъёс, историкъёс но асьсэос бесерманъёс.

Санкт-Петербургысь режиссёрлэн Юлия Мироновалэн кивалтэмез улсын съёмкаос Юкаменск ёросысь бесерман гуртъёсын мынӥзы. Ньыль арскын съёмочной группа отчы 4–5 пол вуылӥз. Час пала кыстӥськись фильмез возьматон азьын режиссёр пусйиз, со этнографи но историографи кино ӧвӧл шуыса, со та дыре, та интывылын улӥсь нимаз адямиос сярысь кино.

Бесерманъёс сярысь нырысетӥ гожтэмъёс 13-тӥ даурын пумисько, но кылем даурысь 30-тӥ аръёсы калык ышиз. Соосты нимаз йӧслыкен пусъемысь дугдӥзы, озьы калык удмуртъёс но ӟучьёс пӧлын «сылмиз». Туала Россиын гинэ бесерман азьветлӥсь Валериан Сабреков быгатӥз калыкезлы ас нимзэ берыктыны. Табере валтӥсез ужпум — нимаз адямиослэсь йӧскалык асваланэз улӟытон.

Фильмын со гуртысь гуртэ ветлэ, бесерманъёслы вашкалаоссэс, йылолъёссэс тодазы возьыны курыса вазиське. Со дыре ик песянайёс дортӥ бесерман крезьёсты гожъяса ветлэ Эстониын дышетскись Мария Корепанова. Соосын ӵош урамъёстӥ ортчыса, коркась корка пыраса, адӟоно, макем секыт улэ гурт калык. 

Валамон, со туж кулэ — асьме выжыосмы, кытын ми вордскемын, кыӵе милям историмы. Но зэмзэ ке, эшшо бадӟымгес инты басьто нимаз адямиос, кудъёсыз уло одӥг бадӟым кунын, туж секыт уло. Со тужгес кышкытэз, мар луыны быгатэ йӧскалык асваланэн герӟаськем ужпумын
Юлия Миронова, «Нация» фильмлэн режиссёрез

«Нация» фильмез учкыны лыктӥз этнограф, истори тодосъя кандидат Елена Попова. Со 1985-тӥ арысен бесерман гуртъёсы экспедициосы ветлэ, соин ик калыклэсь сюлмаськонъёссэ туж умой тодэ. Бесерманъёс ӧй вал паспортъя, но соос быгатӥзы асьсэ лулчеберетсэс, кылзэс возьыны, пусъе выжыезъя ӝыныё бесерман луись тодосчи. 

«Со уж вера туннэ бесерманъёслэн улонзы сярысь, малы соос сокем малпасько асьсэ культуразы сярысь, мар малпало, кызьы со улоз-а, уз-а, кыӵе юанъёс туннэ ӝуто. Сыӵе ик юанъёсты соос ӝуто милям экспедициосамы но, бесерман обществолэн пумиськоназ но, ас сяменызы но малпасько», — вераз ивортодэтъя «Удмуртия» агентстволэн корреспнодентэзлы Елена Попова 

Фильмын ӧвӧл дась валэктонъёс, геройёсын пуктэм юанъёс ваньмы азьын сыло. Туж кулэ ужпумез эскерон, со сярысь вераськон, лыдъя этнограф.

Мыным потэ, любой уж, кудзэ лэсьто бесерманъёс сярысь — мед со луоз книга-а, документальной кино-а, шуом, мар ке кырӟан-а — со вичак (весяк) ужа бесерманъёс вылэ но соос сярысь вера пӧртэм калыкъёслы
Елена Попова, этнограф, истори тодосъя кандидат

Туннэ «Нация» фильмез Ижкарын «Кванториум» нылпи технопаркын возьматӥзы на. Нош ӵуказе, 31-тӥ толшоре, Глазарысь «Россия» культура центрын пумиськон ортчоз. Киноез учкозы асьсэос бесерманъёс. Та возьматон азьын Юлия Миронова уката тулыкмъяське — кызьы дунъялозы ужзэ геройёсыз.

«Нырысьсэ, дыр, мынам тазьы кылдӥз — фильмысь геройёс мон понна матысь эшъёсы кадь луизы. Та съёмкаос дыръя мон туж трос эшъёс шедьтӥ. Оглом но удмурт музъем монэ ӟеч мылкыдын пумитаз, кино пӧрмонлы но мылкыд сётӥз. Угось кин ке но сое умоен лыдъялоз но коньдон сётоз шуыса нокыӵе луонлыкъёс ӧй вал. Озьы ке но, ваньмыз умой пӧрмиз. Мон со адямиосты туж зол яратӥсько», — пусйиз Юлия Миронова.

«Лэсьтоды на-а Удмуртиын эшшо кыӵе ке уж?» юанлы режиссёр вераз: «Уг тодӥськы, улон возьматоз».



Наверх
Вниз