Ижкар+11 °C
18 -тӥ коньывуон 2021 Вордӥськон
18+

Александр Бречалов: Удмуртие лыктыса, пельнянь тросгес сиыны кутски

  • 757
  • 0
Ижкар / Удмуртия
Александр Бречалов: Удмуртие лыктыса, пельнянь тросгес сиыны кутски
Туспуктэм: Григорий Фомин

1-тӥ тулыспалэ Удмуртиын «Пельняньлэн дунневыл нуналэз» фестивальлы кутскон сётӥзы. Пельнянь кутон сямен элькунысь тодмо муртъёс журналистъёслэн юанъёссылы валэктонъёс сётӥзы. Пӧрасьёс пӧлын улосвыллэн тӧроез Александр Бречалов но вал.

Солэн кылъёсызъя, пельнянь кутыны со пинал дырысеныз ик кутскиз ни. Выль ар азьын быдэс семьяен пӧрало вылэм. Удмуртие лыктытозь араз кык-куинь пол гинэ пельнянь сиисько вал, нош татын ужаны кутскем берам, оло, котькуд арня, серекъяса вераз Удмуртилэн тӧроез.

Али тросгес кутски ни (пельнянь сиыны — ред.) азьло кулэ ӧй вал лыдӟыны, малы ке шуоно со араз 2–3 пол гинэ луэ вал. <…> Кухня мыным кельше. Спортэн выремме лыдэ басьтыса, татын калорийёс тырмымт луо
Александр Бречалов, Удмуртилэн тӧроез

Фестиваль сярысь вераса, Удмуртилэн тӧроез пусйиз, «Пельнянь-фест» вылӥ уровенен ортче шуыса.

«Возьыт ӧвӧл асьме ужрадъёсы, асьме праздникъёсы ӧтьыны. Мон кутсконысен ик вералляй, туж трос ужрадъёс классной уровенен лэсьтэмын шуыса, асьмелы кулэ <…> карыны озьы, сыӵе ужрадъёс тросгес мед луозы шуыса. Ми ӵошатӥм, шуом, «Пельнянь-фест» кадь (ужрадъёсты — ред.), но таӵе уровенен асьмелэн гинэ ортче», — шуиз Александр Бречалов.

Пельнянь фестивальлы кутскон сётӥзы Удмуртиын


Котькуд ар фестивалез аспӧртэмлыко радъяны но куноосты маин ке но паймытыны тыршо. Туэ ужрад конструкторлы пӧрмиз, ивортӥз Удмуртиысь йӧскалык политикая министр Лариса Буранова. Туннэ фестиваль сиён но пельнянь сярысь гинэ ӧвӧл ни, со Удмуртиысь вань тунсыкозэ, ческытсэ но шаплызэ огазеяз.

«Мыным туж кельше, ми доры пӧртэм темаос ватсаськизы шуыса. Кылсярысь, тазалык тема. Тӥ тодӥськоды «Платформаен» ми «Пельнянь диета» радъяськом шуыса. Нылпиослы вӧлметъёс ватсаськизы. Вань милям фестивальын мерлыко площадка, тазалыксыя аспӧртэмлыко пиналъёслы ми площадка лэсьтӥськом», — вераз Лариса Буранова.

Ижкарысь ресторатор Кирилл Барков малпамъя, пельнянь ноку но фастфуд уз луы, со котьку йӧскалык сиён лыдъяськоз.

«Фастфуд — со ӝог сиён. Нош татын тон ӝог нокызьы но уд лэсьты. Азьло сое асьмелэн туртто вал лэсьтыны, <…> ӧз пӧрмы. <…> Тани ми пӧзьтӥм пельнянь, вить минут ортче, со тӧла ни», — валэктӥз Кирилл Барков.

Пельнянь — со удмуртъёслэн йӧскалык сиёнзы бере, котькуд удмурт семьяын вань асьсэлэн сямъёссы но амалъёссы, кызьы сое пӧраны. Кылсярысь, «Брангуртысь песянайёс» коллективын кырӟась Галина Конева пельнянез сӥль коже гинэ уг куты, озьы сиён чурыт луэ, лыдъя со.

Сӥльын кубыстаен лэсьтӥськом, кӧс дыръя ми кубисталэсь гинэ лэсьтӥськом, картофкалэсь, губилэсь, колыслэсь но лэсьтӥськом вал. <…> Сӥль коже гинэ чурыт луэ
Галина Конева, «Брангуртысь песянайёс» коллективын кырӟась

Аслаз йылолэз вань солэн ансамблья эшезлэн Алевтина Бегишевалэн но. Со пельнянез нюлэскын шунтэм лымылэсь вуын пӧзьтэ.

«Пельнянь гуртын пӧраськом, таӵе пичи нуныкае но. Мынӥськом нюлэскы, нюлэскын тылскыса, лымыез шунтӥськод, сыӵе ческыт пельнянь пӧрме», — аслаз рецептэныз Алевтина Бегишева.

Удмуртиысь йӧскалык политикая министр Лариса Буранова верамъя, пельнянь со туж ӵем сие, малы ке шуоно анай-атаез гуртын уло. Соин ик пельнянь пӧраны луонлыксы вань.

Килограммъёсын кутӥське, кезьытэ поттӥськод, собере холодильнике интыяськод. Со сыӵе умой маке, малы ке шуоно, куке мынам дыры ӧвӧл, уйин гуртэ бертӥськод ке, мон тодӥсько, пиелэн кӧтэз тыремын шуыса, малы ке шуоно песянайлэн пельняньёсыз котьку холодильникын вань
Лариса Буранова, Удмуртиысь йӧскалык политикая министр

Тодэ вайытом, «Пельняньлэн дунневыл нуналэз» фестиваль Удмуртиын 1–10 тулыспалэ ортчоз. Та нуналъёсы Ижкарын пӧртэм ӧръёсъя «Пельнянь мастерскойёс» радъяськозы. Ужрадлэн йылпумъян нуналаз Шор площадьын куинь вӧлмет ужалоз, отын пельнянен герӟаськем «Тау» музей усьтӥськоз но «Удмурт шумовка» кубок понна вожвылъяськон ортчоз.



Наверх
Вниз