Ижкар+1 °C
13 -тӥ оштолэзь 2021 Пуксён
18+

«Удмурт йӧ» фестивале Россиысь но Белоруссиысь 15 команда вуиз

  • 386
  • 0
Ижкар / Удмуртия
«Удмурт йӧ» фестивале Россиысь но Белоруссиысь 15 команда вуиз
Туспуктэм: Никита Иванов

«Удмурт йӧ» фестивале Россиысь но Белоруссиысь 15 команда пыриське. Маин паймытозы Иж тыметлэсь ярдурзэ чебертӥсьёс, ивортодэтъя «Удмуртия» агентстволы вераз одӥгез радъясьёс пӧлысь Максим Верёвкин.

Фестивале Россилэн тужгес кыдёкысь улосвылъёсысьтыз но пыриськисьёс вань — Полярной круг сьӧрысь Нарьян-Марысь. Озьы ик Минскысь чеберлыкъя академиын дышетскисьёс, Екатеринбургысь но Свердловск улосвылысь, Томскысь но Томск улосвылысь, Королёвысь, Архангельскысь усточиос лыктӥзы. Удмуртилэсь луонлыкъёссэ возьмато Ижкарысь, Алнаш но Пичи Пурга ёросъёсысь скульпторъёс.

Тужгес тунсыко ужъёс пӧлын Максим Верёвкин Минскысь студенткаослэсь ужзэс пусйиз, соос «Светильник» композиция дасяло. Шоргожезъя со куинь метр пала луэ.

Шораз лампочка ӝуа, нош со котыртӥ бубылиос лобало
Максим Верёвкин

Пиналъёслы шудыны кык гурезь но шундылы укшась быжо тылобурдо кадь «тэркы» лэсьтэмын.

Фестивальын шунды тема ужысь уже выже, угось адӟытон Масленчаез пусъёнлы сӥземын
Максим Верёвкин

Юмшан удмуртарняе кутскоз, йӧ скульптураосын паркез сӥё-дано усьтон кӧснуналэ, 17-тӥ тулыспалэ, 14 часын чакламын.

Иж тымет дурын йӧ скульптураосты кылдытон

3 фото

Удмуртарняысен арнянуналозь карын улӥсьёс но куноос азьын Россилэн пӧртэм каръёсысьтыз крезьгурасьёс шудозы-кырӟалозы.

«Масленча кырӟанъёсын этно-группаос ӧвӧл, луоз электрон крезьгур, рок-коллективъёс. Тунсыко пӧлэстон, крезьгур огшоры ӧвӧл», — валэктӥз Максим Верёвкин.

Праздниклы сӥзем шулдыръяськонлэн шорсюлмыз луоз тымет вылын куролэсь сульдэръёсты сутон.

Аспӧртэм вакыт, угось куке тыл но йӧ одӥг интыын ваче вуо, быдӟым чеберлык луэ
Максим Верёвкин

Валтӥсь ужрадъёс азьланьын ке но, усточиослэсь ужамзэс туннэ учкыны луэ ни.

«Удмурт йӧ» фестиваль


«Фестивальлэн берпуметӥ нуналъёсыз Вӧйдыр шулдыръяськонъёсын тупало, соку милям Иж тымет вылын тыло скульптураосъя фестиваль ортчоз. Удмурт йӧ — со 100 процентлы скульпторъёслэн кичӧлтонзы, кин милем кылчинъёсты но архангелъёсты лэсьтӥз. Таяз ми соослы дурбасьтӥм», — «Мынам Удмуртие» телерадиокомпанилэн меӵак эфираз азьвылгес вераз Удмуртилэн тӧроез Александр Бречалов.



Наверх
Вниз