Ижкар-19 °C
26 -тӥ тулыспал 2021 Удмуртарня
18+

Гуръя батырез бырйизы Балезино ёросын

  • 653
  • 0
Гуръякар / Удмуртия
Гуръя батырез бырйизы Балезино ёросын
Туспуктэм: Удмуртиысь Лулчеберетъя но туризмъя министерстволэн пресс-службаез

Ивор сётӥсь тылъёсты ӝуатонъя «Огни ДондыДора» истори эскерон улсын Балезино ёросын «В посиках Гуръя батыра» вожвылъяськонын тужгес но кужмозэ воргоронэз бырйизы. Ужрад Гуръякар гуртын 23-тӥ тулыспалэ ортчиз. Отчы вить мылкыд карись воргоронъёс пыриськизы. Со сярысь ивортодэтъя «Удмуртия» агентстволы Балезино ёросысь Лулчеберетэз азинтонъя центрлэн ӧнерчиез Ольга Першина вераз.

Солэн кылъёсызъя, Глаз ёросын «Огни ДондыДора» экспериментэз радъясьёс ужрадэз паськытатыны но ёроскуспо карыны чаклало, соин ик бускель Балезино ёрос отчы кыкетӥ ар пыриське ни. Кылем арын Гуръякарын ивортӥсь тылъёс гинэ ӝуатӥзы, нош туэ батыръёс пӧлын вожвылъяськон но ортчытӥзы ни, шуиз Ольга Першина.

Вить батыр ми люкам но соослы ортчытӥм эстафета. Одӥгаз станциын соос тыл ӝуатӥзы. <…> Мукетаз станциын мешок ӝутъязы, сыӵе кужымез эскеронъя уж вал. Мукетаз станциын юанъёслы валэктон сётӥзы, историяя юанъёс вал
Ольга Першина, Балезино ёросысь Лулчеберетэз азинтонъя центрысь ӧнерчи

Со сяна, батыръёс ӵошатскизы пуклёез кыдёке куянэн, пукыӵен ыбылӥськонэн, шибоды куянэн но мукет. Тужгес кужмоез но быгатӥсез батыр Падера гуртысь Вильдан Касимов луиз. Воргорон Гуръя батыр ним басьтӥз но кузьымъёс утӥз.

Батыръёслэн вожвылъяськонзы

5 фото

Лулчеберетэз азинтонъя центрысь ӧнерчи верамъя, вуоно арын та вожвылъяськонэз азьланьтозы. Туэ учкисьёс пӧлын ик отчы пыриськыны мылкыд карисьёс вал ни, шуэ Ольга Першина.

Тани учкись калыкъёс вал, соос шуо: «Мынам но потэ вылэм пыриськеме, мон тодытэк кыли. Вуоно аре нош ик луиз ке, мон но мыно», – тӥни сыӵе вераськисьёс трос вал
Ольга Першина, Балезино ёросысь Лулчеберетэз азинтонъя центрысь ӧнерчи

Ватсалом, Гуръякар ёрос центрлэсь кыдёкынгес ке но интыяськемын, «В поисках Гуръя батыра» вожвылъяськонэ ог 200 пала учкисьёс люкаськизы.

Тодэ вайытом, «Огни ДондыДора» ужрад улсын 2017-тӥ арын 24-тӥ тулыспалэ Глаз, Яр но Балезино ёросъёсын ивортӥсь тылъёс Учкакарысен Гуръякарозь каръёсты герӟазы. Туэ тылъёс 23-тӥ тулыспалэ ӝуатскизы. 



Наверх
Вниз