Удмурт но ӟуч сям-йылолъёсты возьматӥзы Глаз ёросын «Зарни шыкыс» фестивальын

Глаз ёросысь Куреггурт школаын Удмуртиын улӥсь калыкъёслэн сям-йылолъёссыя «Зарни шыкыс» III фестивальын 2-тӥ южтолэзе удмурт но ӟуч йылолъёсты возьматӥзы. Со сярысь ивортодэтъя «Удмуртия» агентстволы Куреггурт школаысь удмурт кылъя дышетӥсь, фестивалез одӥгез радъясь Маргарита Чибышева вераз.

Солэн кылъёсызъя, ужрадэ пыриськисьёслэн лыдзы арысь аре будэ. Азьвыл аръёсы отчы Глаз ёросысь гинэ школаос пырисько вал, нош туэ Балезино ёросысь Пӧбъя гуртысь школа но итӥськиз. Таяз радэ пыриськисьёс «Корка пырон», «Вожодыр», «Корка миськон» но «Солдатэ келян» удмурт сямъёсын но «Вӧйдыр» ӟуч йылолъёсын тодматӥзы.

Асьмелэн ӟучъёс но трос, бигеръёс но, собере бесерманъёс но тани милям гинэ татын интыосамы. Соин ик соослэсь но сям-йылолъёссэс медаз вунэтэ шуыса, котькыӵе калыклэн сям-йылолэныз мед лыктозы шуиськомы

Дышетӥсь ивортэмъя, та ужрадэз школаысь удмуртлыкез утён бордын ужасьёс пиналъёсты вашкала сям-йылолъёсын тодматон понна малпазы.

Кин пань-пань удмурт кылэз вала, удмуртлык понна кинэн выриськомы, соосын малпам удмурт сямъёсын, вашкала вунэм сямъёсын пиналъёсты тодматыны

Маргарита Чибышева верамъя, «Зарни шыкыс» фестивале нырысетӥ классысен 11-тӥ классозь пиналъёс пырисько. Со сяна, мылкыдзыя бадӟымъёс но дышетскисьёслы юрттыны быгато.

Кин ке но анай-атайёссэ но вае. Тани туэ Кожиль школаос, отын фольклоръя «Дыдык син» ансамбльзы вань, тӥни со «Дыдык синысь» лыктылӥзы песянайёс, песятайзы но вал. Собере кылем аре Гылёгуртысь нылпи садысь но лыктӥзы пиналъёс. Соин ик вань мылкыд карисьёсты ми отчы витиськомы

Радъясьёс та фестивалез азьланьтыны малпало. Кутскимы бере, ӝыны сюресын медам аналтэ, шуиз Маргарита Чибышева.