Ижкар-24 °C
6 -тӥ толсур 2021 Вордӥськон
18+

Пичи Пурга ёросысь котькуд муниципал кылдытэтын экскурсиосъя маршрут кылдыны кулэ

  • 814
  • 0
Пичи Пурга / Удмуртия
Пичи Пурга ёросысь котькуд муниципал кылдытэтын экскурсиосъя маршрут кылдыны кулэ
Туспуктэм: vk.com (По святым местам Аксакшура)

2018-тӥ ар ӵоже Пичи Пурга ёросысь котькуд муниципал кылдытэтын экскурсиосъя маршрут кылдыны кулэ. Сыӵе ужпум пуктэмын ёрос лыдӟетъюртлэн 15-тӥ тулыспалысен 1-тӥ толсурозь ортчись «Мои истоки» вожвылъяськоназ. Со сярысь ивортодэтъя «Удмуртия» агентстволы конкурсэз одӥгез радъясь, лыдӟетъюртысь ӧнерчи Валентина Петрова вераз.

Жаляса верано, ми ум тодӥське ёросмес, асьме покчи вордскем шаермес. Котькудӥз аслаз гуртаз улэ, аслаз черкогуртаз. Кылсярысь, улӥськом Норьяын, нош мар со Вуж Мӧнья, кыӵе отын объектъёс, тунсыко интыос — сое ум тодӥське. Соин ик, ёросмес тодон понна таӵе конкурс ялӥмы
Валентина Петрова, Пичи Пурга ёрос лыдӟетъюртысь ӧнерчи

Солэн кылъёсызъя, вожвылъяськонэ вань мылкыд карисьёс пыриськыны быгато. Нырысь ик гурт поселенилэн историезъя, тунсыко интыосызъя но сям-йылолъёсызъя, отысь тодмо адямиосъя эскерон уж лэсьтыны кулэ. Собере бичам ивортодэт вылын экскурсиосъя маршрут кылдытоно но дышетскисьёс яке шаертодӥсьёс пӧлысь экскурсоводъёсты дасяно. Дась маршрутъя мукет школаосысь пиналъёс, мукет муниципал кылдытэтъёсысь вань мылкыд карисьёс понна экскурсия ортчытӥськоз, шуиз Валентина Петрова.

Малпанмы сыӵе — мукет школаосысь пиналъёс мед ветлозы та маршрутъёстӥ. <…> Кин ке но туспуктоз, мар солы кельшиз. Кин ке но, кылсярысь, суред лэсьтоз. Кин ке но сочинение гожтоз. <…> Нырысь ик соос асьсэ школаязы адӟытон лэсьтозы, нош собере татчы, ёрос лыдӟетъюртэ сётозы. Озьыен, котькуд муниципал кылдытэт сярысь милям туспуктэмъёсмы но, суредъёсмы но, эссэосмы но луозы
Валентина Петрова, Пичи Пурга ёрос лыдӟетъюртысь ӧнерчи

Валентина Петрова верамъя, туннэ нуналлы куриськонъёс ӧз вуэ на, но экскурсиосъя маршрутъёс кылдытыны кутскемын ни, кылсярысь, Норья муниципал кылдытэтын.

«Отчы пыре, валамон, черк. Собере Норъяе пырон азьын вань тунсыко арт-объект, шуом <…> — пулэсь вуко, кышномурт озьы ик пулэсь. Со Норья выжылэн анаез. Собере Норья вӧзын вань Улынгурт, отын 2015-тӥ арысен «Тропа охотника Пужея» маршрут ужа. Со но пыре туризмъя маршрутэ. Школаысь музее ветлыны луэ, отын озьы ик тунсыко арбериос люкамын. Собере отын вань вӧсям ошмес, отын вань часовенкаез», — валэктӥз Валентина Петрова.

Конкурсэз радъясь пусйиз, экскурсиосъя маршрутъёс кылдытон сяна, та ужрадлэн эшшо кык валтӥсь йылпумъянэз луоз на: пиналъёслэн эскерон ужъёсынызы электрон лыдӟетъюрт но лулчеберетъя луонлыкъёсын электрон карта.

Ватсалом, конкурслэн вормисез маршрутсэ азинтонлы 20 сюрс манет утоз. Озьы ик коньдонкузьымен школаысь куинь устооссэ адӟытонъёсты пусъёзы.



Наверх
Вниз