Ижкар+9 °C
22 -тӥ коньывуон 2021 Удмуртарня
18+

Можга ёрослэн литератураезлы сӥзем адӟытон ужалоз южтолэзе Ижкарын

  • 840
  • 0
Ижкар / Удмуртия
Можга ёрослэн литератураезлы сӥзем адӟытон ужалоз южтолэзе Ижкарын
Туспуктэм: Ульяна Колмогорова

Южтолэзе Йӧскалык лыдӟетъюртлэн Йӧскалык но шаертодон литературая центраз (Удмурт урам, 264) Удмуртиын Можга ёрослэн литератураезлы сӥзем нуналъёслы дасям «Выль книгаос, выль нимъёс» адӟытон ужалоз. Со сярысь элькунысь Йӧскалык лыдӟетъюртлэн пресс-службаез ивортэ.

Кызьы шуэмын ивортонын, Можга музъем дано гожъяськисьёсын узыр. Татын Удмуртиысь калык писатель Трофим Архипов, прозаик Михаил Коновалов, удмурт драматургилэн классикез Игнатий Гаврилов, кылбурчи но режиссёр Михаил Покчи-Петров. драматург Анатолий Григорьев, кылбурчи Анатолий Леонтьев но мукетъёс вордскизы. Озьы ке но, адӟытонын удысужлыко гожъясьёслэн ужъёссы возьматэмын ӧвӧл.

Адӟытонэ поттэм ужъёслэн авторъёссы — профессиональной писательёс ӧвӧл. Соос пӧртэм арлыдо, пӧртэм интыосын ужало, но ваньзэсты огазея литературной творчествоез яратон. Ваньмыз, мар сярысь соос гожъяло, валамон но матын луэ котькинлы: вордскем гурт, городлэн яратоно ульчаосыз, семьялэн шунытэз, оскымон эшъёс
Удмуртиысь Йӧскалык лыдӟетъюртлэн пресс-службаез

Озьы, ӝажыос вылысь Можга ёросысь удмурт кылъя но литературая, историяя но англи кылъя дышетӥсьёслэсь кылбур бичетъёссэс, ӟучысь удмуртэ берыктэм калык выжыкылъёсты адӟыны луоз. Со сяна адӟытонэ нылпиослэн творчествоя ужъёссы, «Инвис» кылбур клублэн но «Инвистёнок» нылпи литературной клублэн ёзчиосызлэн ужъёссы поттэмын. Озьы ик Можга ёросысь сӧсыръёсын кылдытэм «Мы вновь сильны и дерзновенны» бичет возьматэмын.

Тодэ вайытом, Удмуртиысь муниципал кылдытэтъёслэн литературазылы сӥзем нуналъёслэсь эстафетазэ 2017-тӥ арын шуркынмон пумын Можгалы Алнаш ёрос сётӥз. Можга ёрослэн литератураезлы сӥзем нуналъёсты 30-тӥ южтолэзе сӥё-дано усьтозы.



Наверх
Вниз