Ижкар+1 °C
13 -тӥ оштолэзь 2021 Пуксён
18+

8 выжыкыл возьматӥзы «Выжы-выжы-выжыкыл» нылпи элькун фестивальын Ижкарын

  • 1115
  • 0
Ижкар / Удмуртия
8 выжыкыл возьматӥзы «Выжы-выжы-выжыкыл» нылпи элькун фестивальын Ижкарын
Туспуктэм: Григорий Фомин

Туннэ, 23-тӥ южтолэзе, «Выжы-выжы-выжыкыл» IV нылпи элькун фестивальлэн йылпумъян люкетэз ортчиз. Удмуртиысь Калыкъёслэн эшъяськон юртазы Алнашысь, Пичи Пургаысь, Глазкарысь но Ижкарысь нылпи садъёсы ветлӥсь пиналъёс 8 выжыкыл возьматӥзы.

«Выжы-выжы-выжыкыл - 2018» фестивальлэн йылпумъянэз


Таяз арын финн-угор калыкъёслэсь выжыкылъёссэс удмурт кылын пуктыны кулэ вал. Ижкарысь 148 номеро нылпи сад, кылсярысь, «Пичи пастух» мадьяр выжыкылэн финалэ шедиз. Нош 208 номеро садын мордва выжыкылэз удмуртэ берыктӥзы.

Ольга Аркашева Ижкарысь 208 номеро нылпи садын ватсаса тодон-валанъёс сётонъя дышетӥсь луыса ужа, озьы ик 18 номеро садын занятиос нуэ.

«Средний группаын кутскыса, кык пол арнялы ветло мон доры занятие пиналъёс, отын ми удмурт культураен тодматскиськом но удмурт кылъёсты дышетӥськом. Собере выжыкылъёсты ӟуч кылын лыдӟиськом но, удмурт кылэ берыктыса, постановкаос лэсьтӥськом. Нырысь ӟуч кылын пуктӥськомы, собере удмурт кылын пуктӥськомы ни», — вераз Ольга Аркашева.

Солэн кылъёсызъя, удмурт кылын вераськись пиналъёссы нылпи садын одӥг но ӧвӧл. Озьы ке но, соос удмурт кылын выжыкылъёсты пуктонэ мыло-кыдо пырисько.

Туж паймисько со пиналъёслы: тазьы быдэ вуэм адямиос туж секытэн дышетӥськомы мурт кылэз, нош пиналъёслы туж капчиен сётӥське кадь мыным потэ со удмурт кылъёс вераськыны но
Ольга Аркашева, Ижкарысь 208 номеро нылпи садын ватсаса тодон-валанъёс сётонъя дышетӥсь

Удмурт кылэз тодӥсь пиналъёс ӧвӧл Ижкарысь 279 номеро нылпи садын но. Озьы ке но, удмурт ужрадъёсы пыриськонлэсь уг палэнтӥсько . Визьнодасьсы Алевтина Егорова верамъя, шугъяськонъёс кылдо удмурт кылъёсты веран ласянь гинэ, нош дышетон капчи сётӥське.

Соослы тунсыко, соослы потэ, соос кыӵе ке кунсьӧр кылын верасько кадь, собере валаны кутско — со кунсьӧр кыл вӧл, со татын артэ, асьме удмурт кыл
Алевтина Егорова, Ижкарысь 279 номеро нылпи садысь визьнодась

Глазкарысь 25 номеро нылпи сад «Выжы-выжы-выжыкыл» фестивале туэ нырысьсэ пыриськиз. Удмурт кылэз тодӥсь пиналъёссы угось татын но ӧвӧл.

«Валлё (нырысь) ми пиналъёслы ӟуч кылын лыдӟимы куинь-а, мар-а выжыкыл. Соос шуизы, таиз, пе, ӟечгес. Рольёсты но, кызьы соослэн асьсэлэн потӥз, озьы ик бырйизы — кин луэмез потӥз, со ик луиз. <… > Ми нырысь ик юаськом нылпиослэсь мылкыдзэс», — вераз визьнодасьсы Елена Дюкина.

Фестивальлэн нырысетӥ люкетаз Глазкарын кык гинэ нылпи садъёс пыриськиллям. Миым тросгес вылэм, но туэ уноез пиналъёс висьыны усиллям. Карын вормемзы бере пиналъёсмы туж шумпотӥзы но асьсэос йылпумъян люкетаз куриськизы, бадӟымъёслэн, оло, мынэмзы но уггес поты вал, пальпотыса вераз Елена Дюкина. Солэн верамезъя, возьматонзэс дасяны толэзь куспын вуттӥзы.

Ӧвӧл секыт, быдэс группамы ик тодэ ни со выжыкылэз, котькудӥз котькинэ быгатоз воштыны, котькыӵе ролез шудыны
Елена Дюкина, Глазкарысь 25 номеро нылпи садысь визьнодась

Озьы ик визьнодасьёс тау каризы нылпиослэн анай-атайёслы.

«Анай-атайёс но юн капчиесь, мае ке вераськод, котьку юртто милем, котьмаин но», — пусйиз Елена Дюкина.

Элькун фестивальлэн каръёсын но ёросъёсын ортчись люкетаз 28 выжыкыл возьматӥзы. Радъясез, «Удмурт нылкышно кенеш» огазеяськонлэн кивалтӥсез Надежда Степанова верамъя, мылкыд карисьёс тросгес вал, но ӵапак со вакытэ пиналъёс висьыны усьылӥзы. Со сяна, мукет но мугез вань.

«Ижкарысь туэ ӧжытгес пыриськизы — 14 гинэ нылпи сад. Маин со герӟаськемын? Жаляса верано луэ, арысь аре секытгес но секытгес городъёсын дышетыны, Ижкарез ке тани басьтоно, удмурт кылэз. Со герӟаськемын ӧнерчиосын. Котькытын оптимизация. Удмурт кыл — со луэ дополнительной образование чотын, нош ватсаса дышетонъя ставкаос оптимизациен валче ӧвӧл ни. Ижкарез ке басьтоно, 208 номеро нылпи садын нимысьтыз вань дышетӥсьсы но 112-тӥ номеро нылпи садын. Соос котькуд аре ӟеч емышъёс возьмато», — валэктӥз Надежда Степанова.

Озьы ке но, солэн кылъёсызъя, «Выжы-выжы-выжыкыл» фестиваль «Удмурт нылкышно кенешлэн» одӥгез устоез ӵектосэз луэ.

Та проектмы одӥгез устоез мон лыдъясько, малы ке шуоно театрализация пыр пинал усьтӥське, удмурт кылэз но капчигес солы дышетыны луэ
Надежда Степанова, «Удмурт нылкышно кенеш» огазеяськонлэн тӧроез

Фестивальлэн йылпумъян люкетаз шедем вань нылпи садъёсты пӧртэм ӧръёсъя пусйизы: устоез выжыкыл, устоез берыктэм выжыкыл, устоез сценарий. Озьы ик нимысьтыз пусйизы выжыкылэз утосзэ берыктӥсез, рольёсты тужгес умой шудэм пиналъёсты. Нош дипломъёс но синпельёс ваньмыз нылпиос басьтӥзы.

Выжыкылъя фестивале пыриськисьёс

10 фото

Ватсалом, азьланяз ӵектос паськытаны но быгатоз, оло.

«Удмурт нылкышно кенешмы» ӟеч кусыпъёс юнматӥз Башкортостанэн, Татарстанэн, милям вераськонмы вань, оло, азьланяз тани Татарстанысь но нылпиос пӧлын нылпи проектъёсмес азинтом шуыса», — вераз Надежда Степанова.

«Выжы-выжы-выжыкыл» нылпи фестивалез радъяло «Удмурт нылкышно кенеш» но «Удмурт Кенеш» огазеяськонъёс Удмуртиысь йӧскалык политикая министерство, Калыкъёслэн эшъяськон юртсы но интыосысь администрациос юрттэм улсын.


Наверх
Вниз