Финн-угор сиён-юонъя «Быг-Быг» V калыккуспо фестиваль Шаркан ёросын 2018-тӥ арын 5–7 пӧсьтолэзе ортчоз. Ужрадлэсь валатэтсэ (положенизэ) 2-тӥ оштолэзе юнматӥзы, вераз ивортодэтъя «Удмуртия» агентстволы Удмурт лулчеберетъя «Быгы» центрлэн кивалтӥсез Жанна Ермолаева. Озьы ик со ик фестивальлэн выль ужрадъёсыныз вакчияк тодматӥз.
Озьы, туэ нырысьсэ «Быг-Быг» фестиваль но «Даур герӟет» усьтэм элькун фестиваль-конкурс улсын туала йӧскалык крезьгуръя фестиваль ортчоз.
Тани конкурс малпамы туэ туала крезьгуръя — R&В, рок, реп. Сыӵе туала ӧръёсъя. Сыӵе одӥгез площадкамы луоз вылез. Егитъёслы сӥзем нуналэ со луоз милям 6-тӥ пӧсьтолэзе
Жанна Ермолаева, Удмурт лулчеберетъя «Быгы» центрлэн кивалтӥсез
Солэн кылъёсызъя, кылем арын туж тунсыко пӧрмиз ёросъёсысь гуртъёсын ортчем «Вунэтэм удмурт сиён-юонъёс» экспедиция. Таяз арын узы-борыез но будосъёсты кутон ужпумъёслы сӥзем конференци радъяны малпазы. Ужрад Вортчаын ортчоз.
Одӥгзэ лабораториез нуоз Франциысь тодосчи Ева Тулуз. Чакланъёсъя, со Башкириын улӥсь удмуртъёслэн сям-йылолъёссы сярысь вераськоз.
Азьвыл аръёсы сямен ик сиён пӧрасьёслэн, творчествоя коллективъёслэн вожвылъяськонъёссы, калык киужъёсъя адӟытон радъяськозы.
Жанна Ермолаевалэн верамезъя, кылем арын «Быг-Быг» фестивале куинь нуналскын 3 сюрс пала пыриськисьёс но куноос вуылӥзы. Таяз арын тросгес калык люкаськоз шуыса оско.
Туэ куноос туж трос витиськомы — Карелиысь, Эстониысь, Венгриысь. Подтвердить каризы ни соос лыктозы шуыса
Жанна Ермолаева, Удмурт лулчеберетъя «Быгы» центрлэн кивалтӥсез
Ватсалом, 2017-тӥ арын финн-угор сиён-юонъя «Быг-Быг» фестиваль Россиысь этнографияя 10 тужгес тунсыко гужем фестивальёс пӧлы шедиз.
Наши партнеры
