Глаз ёросысь нылъёс «Театральный калейдоскоп» калыккуспо фестивальлэн нырысетӥ степенё лауреатъёсыз луизы

Глаз ёросысь Качкашур школаысь «Пинал модельер» огазеяськонэ ветлӥсь нылъёс «Театральный калейдоскоп» калыккуспо вожвылъяськон-фестивальлэн «Модая театр» ӧрын нырысетӥ степенё лауреатъёсыз луизы. «Музыкальный Звездный Олимп» калыккуспо ӵектос улсын  2–5 куартолэзе Волгоградын ортчем ужрадын куать нылашъёс «Торжество геометрии» коллекцизэс возьматӥзы, вераз ивортодэтъя «Удмуртия» агентстволы творчествоя огазеяськонлэн кивалтӥсез Зоя Ушакова.

Костюмъёс авангард стилен лэсьтэмын вал: огазеямын огазеяны луонтэм басмаос, буёлъёс, технологиос. Котькудаз кыӵе ке но геометрической люкетэз вань: куиньсэрго, ньыльсэрго, котырес фигураос, котырес яке сэрего вандэмъёс. Соос пыр эшшо ӝуась лентаос лэземын, крезьгур улсын соос пишто но геометриез эшшо яркытгес возьмато

Зоя Ушакова верамъя, та коллекцизэс нылъёс туэ оштолэзе Ижкарын ортчем Модая театръёслэн «Новая линия» элькун конкурсазы дасязы вал. Отын «Альтернативная мода» ӧрын кыкетӥ степенё диплом басьтӥзы.

Качкашурысь школаын пинал модельеръёслэн огазеяськонзы кемалась ужа ни. Нылъёс котькуд ар выль коллекциос дасяло, пӧртэм вожвылъяськонъёсы пырисько, но Удмуртилэн палэназ нырысьсэ потазы, пусйиз огазеяськонлэн кивалтӥсез.

Соос ваньзы лӧптэмын. Отын 30 градус пӧсь вал, соос ваньзы шунды шоры пыжыса вуизы. Эшшо экскурсиос вал — Мамаев курганысь быдэс со комплекс, «Сталинградская битва» панорама, теплоходэн Волга кузя уян. Туж умой ваньмыз радъямын вылэм

Ватсалом, Волгоградэ нылъёсын ӵош ветлӥз дефилея дышетӥсьсы Вера Сабурова.