Ижкар-11 °C
22 -тӥ толшор 2021 Удмуртарня
18+

«Усьтэм инбам улын театр» элькун фестивале куриськонъёсты кутон мынэ Удмуртиын

  • 400
  • 0
Красногорск / Удмуртия
«Усьтэм инбам улын театр» элькун фестивале куриськонъёсты кутон мынэ Удмуртиын
Туспуктэм: Григорий Фомин

Удмуртиын «Усьтэм инмаб улын театр» элькун фестивале куриськонъёсты кутон мынэ. Красногорск черкогуртэ 16-тӥ инвожое элькунысь театрез яратӥсь нылпиослэсь но арлыдоослэсь коллективъёсты возьмало. Ужрад ёросысь Кокман гуртын вордскем СССР-лэн калык артисткаезлы Ольга Книппер-Чеховалы 150 ар тырмонлы сӥземын. Со сярысь ивортодэтъя «Удмуртия» агентстволы лулчеберетъя но спортъя «Красногорский» огъетысь калык творчествоя ёзэтлэн кивалтӥсез Ольга Семёнова вераз.

Солэн кылъёсызъя, туннэ нуналлы бускель Балезино ёросысь кык коллектив фестивале пыриськыны мылкыдзэ вераз ни.

Ваньмыз со луоз усьтэм инбам улын, педлон. Шор площадьын луоз. Положение келям элькунысь ёросъёсъя. Жингыртӥ мон тани матысь ёросъёсы. Ответ сётӥз ни Балезино ёрос. Соос куриськизы ни, кык коллектив. <…> Бадӟымъёслэн агитационно-художественной бригадазы гожтэмын но «Весельчак» нылпи коллектив
Ольга Семёнова, лулчеберетъя но спортъя «Красногорский» огъетысь калык творчествоя ёзэтлэн кивалтӥсез

Фестивале пыриськисьёс ӟуч классикая литератураысь произведениосъя спектакль дасяны кулэ, солэн жанрез котькыӵе луыны быгатэ. Со сяна, ужрадын пӧртэм ӧръёсъя площадкаос ужалозы:

  • «Яратоно книгаослэн бамъёсысьтызы» — ӟуч классикая литаратураысь произведениосъя кылдытэм луло суредъёс, туспуктонъя салонлэн ужез но Ольга Книппер-Чеховалы сӥзем адӟытон;
  • «Кибашлыослэн карзы» — чеберлыко киужъёсъя ӧнерчиослэн ужъёсынызы адӟытон-ярмарка, мастер-классъёс но «Чеховские мотивы» темая устозэ ужез быръён конкурс;
  • «Калашный ряд» — эгырен эстӥськись самоварын парем чаен сектан, пӧсь мильымен, «красногоск» пряникъёсын но мукет пӧрамъёсын утялтон;
  • «Детские потешки» — пиналъёслы шудонъёс но аттракционъёс.

Ольга Семёнова пусйиз, фестивальлэн одӥгез ужпумез — театр коллективъёслэсь устолыксэс ӝутон. Соин ик вожвылъяськон программа бере ужрадэ пыриськисьёс но жюри кенешон ортчытозы.

Кинлэ ке пӧрмиз, кинлэ ке ӧз пӧрмы — всё равно кыӵе ке творчествоя лаборатория выллем луоз на конкурс бере
Ольга Семёнова, лулчеберетъя но спортъя «Красногорский» огъетысь калык творчествоя ёзэтлэн кивалтӥсез

Ватсалом, 11-тӥ куартолэзе Красногорскын «Театрен шудӥськом» ёрос фестиваль ортчиз. Отчы муниципалитетысь театръя дас коллективъёс пыриськизы. Куд-огзэ соос пӧлысь элькун ужрадын но адӟыны луоз, вераз радъясь.

«Трос ёрос лыктӥз ке, ми одӥгзэ гинэ — кин нырысетӥ степенё диплом басьтӥз — сое гинэ адӟытом та фестивальын. Ичигес ёросъёс лыктӥзы ке, сыӵе луиз ке, адӟытом ми кыксэ но, куиньзэ но», — шуиз Ольга Семёнова.

«Усьтэм инбам улын театр» фестивале куриськонъёсты krasnogorskiirdk@mail.ru электрон адресъя 25-тӥ куартолэзёзь кутозы.



Наверх
Вниз