Удмуртиысь Евгения Аркова «Мисс Студенчества Финно-Угрии-2018» ним басьтӥз

Удмурт кун университетысь Удмурт кылосбуръя, финно-угороведения но журналистикая институтын кыкетӥ курсын дышетскись дышетскись Евгения Аркова «Мисс Студенчества Финно-Угрии - 2018» калыккуспо вожвылъяськонын вормиз. Конкурс Марий Элысь Йӧшкар-Олаын 25-тӥ куартолэзе ортчиз.

Кызьы шуиз ивортодэтъя «Удмуртия» агентстволы Евгения Аркова, вожвылъяськонлы куинь арня пала дасяськоно луиз. Жюри тужгес но пусйиз нылашлэсь яркыт но аспӧртэмлыко номеръёссэ.

Вал пыж, мон отын пуки, укулелеен шудӥ но кахонэн (барабан выллем крезьгуро инструмент — ред.) одӥг пияш шудӥз. Собере ми возьматӥм йылол, костюмлэн вордӥськемез кадь со луэ, пӧртмаськон. Ми отын эктӥм, перепечен сюдӥм жюриез, кырӟам но

Солэн кылъёсызъя, тужгес но шуг вал визьсынан вожвылъяськон. Отын конкурсэ пыриськисьёслы финн-угор выжыысь калыкъёс, соослэн сям-йылолъёссы сярысь юанъёс сётъязы. Озьы ик нылашъёс веразы, малы соос вожвылъяськонэ пыриськыны малпазы. Со сяна, котькудӥз конкурсантка ӵектос лэсьтыны но одӥг минутскын солэсь кулэлыксэ валэктыны кулэ вал. Евгения Арковалэн проектэз удмурт сюан дэремез туала сюанъёсы пыртонэн герӟаськемын вал.

7 фото

Ватсалом, Евгения Аркова «Мисс Студенчества Финно-Угрии» ним басьтэм сяна, Мисс «Love Republic» луиз. Удмуртиысь эшшо одӥгез пыриськись, Глазкарысь В. Г. Короленко пединститутысь студентка Елизавета Третьякова «Мисс вокал» ним басьтӥз.

Тодэ вайытом, азьвыл «Мисс Студенчества Финно-Угрии» вормисьлэн улосвылаз радъяське вал. Озьы, Удмурт кун университетын дышетскись Алина Антонова вормемен валче, 2015-тӥ арын вожвылъяськон Ижкарын ортчиз. Но таяз радэ, конкурс Россиысь котькуд финн-угор улосвылын мед радъяськоз шуыса, эсэпъёсты воштӥзы. Соин ик вуоно арын со Ханты-Мансийскын ортчоз.