100 лет государственности Удмуртии
Ижкар+10 °C
25 -тӥ куартолэзь 2020 Вордӥськон
16+

Быдэ вуонлы сӥзем «Эру» шулдыръяськон туэ кык нунал кыстӥськоз

  • 991
  • 0
Шаркан / Удмуртия
Быдэ вуонлы сӥзем «Эру» шулдыръяськон туэ кык нунал кыстӥськоз
Туспуктэм: vk.com (УМОО "Шунды")

Быдэ вуонлы сӥзем «Эру» улосвылкуспо шулдыръяськон туэ 29-тӥ но 30-тӥ инвожое Шаркан ёросысь Тол Бабайлэн усадьбаяз но Пегъян Тыло (Петуньки) гуртын радъяськоз. Со сярысь ивортодэтъя «Удмуртия» агентстволы праздникез одӥгез радъясь, «Шунды» огазеяськонлэн кивалтӥсез Алина Чернова вераз.

Солэн кылъёсызъя, ужрадэз паськытатон кӧня ке ужпумез быдэстон вылысь чакламын.

Пиналъёс ог-огенызы тросгес вуттозы тодматскыны, тросгес дырзэс ортчытыны. Собере туж возьмаськом мукет улосвылъёсысь — Башкириысь, Татарстанысь — пиналъёсты. Соос но кузь сюрес вылэ медаз ӝытлы потэ шуыса, весь дыртыса кошко но, тӥни озьы малпамы сыӵе кык нуналъем праздник лэсьтыны
Алина Чернова, «Шунды» огазеяськонлэн кивалтӥсез

«Эрулэн» вожвылъяськон программаяз радъясьёс 14–18 аресъем удмурт егитъёсты ӧтё. Командаын быдэн ньыль пи но ньыль ныл луыны кулэ. Соос «Визитка» но чеберлыко номер дасяло. Со сяна, пыриськисьёс фольклоръя квест-шудонын ӵошатскозы. Нош устозэ егит парез «Кык дыдыкъёс» конкурс улсын быръёзы.

Радъясь верамъя, вожвылъяськон сяна, туэ шулдыръяськонын кавер-группаен дискотека но мастер-классъёс луозы. «Эруез» ортчытон интыез воштэмен, ужрадэ тросгес пыриськисьёс но учкисьёс лыктыны быгатозы, лыдъя «Шундылэн» кивалтӥсез.

Ватсалом, пыриськыны мылкыд карись командаослэсь куриськонъёссэс 20-тӥ инвожоозь zarvishursdk@mail.ru но sharkkult@mail.ru электрон адресъёсъя ыстыны кулэ.

Тодэ вайытом, Удмуртиысь Йӧскалык политикая министерствоен юнматэм быдэ вуонлы сӥзем «Эру» праздник берло куинь аръёсы Шаркан ёросысь Зар-Вишурын радъяськылӥз. Солэсь азьвыл шулдыръяськон Грак но Алнаш ёросъёсын ортчылӥз. Туэ шулдыръяськонэз Калыкъёслэн эшъяськон юртсы, удмурт егитъёслэн «Шунды» огазеяськонзы но Шаркан ёрос администрациысь Лулчеберетъя, спортъя но егитъёсын ужан политикая управление радъяло. 



Наверх
Вниз