Ижкар+1 °C
13 -тӥ оштолэзь 2021 Пуксён
18+

Богдан Анфиногеновлэн но Анастасия Шумиловалэн кылбуръёссы Удмуртиысь туала кылбурчиослэн бичетазы пыризы

  • 591
  • 0
Ижкар / Удмуртия
Богдан Анфиногеновлэн но Анастасия Шумиловалэн кылбуръёссы Удмуртиысь туала кылбурчиослэн бичетазы пыризы
Туспуктэм: vk.com (Штаб современной поэзии «ПоэтUp»)

Егит удмурт кылбурчиослэн Богдан Анфиногеновлэн но Анастасия Шумиловалэн кылбуръёссы Удмуртиысь туала кылбурчиослэн «Поэт Up» альманахсылэн нырысетӥ люкетаз пыризы. Бичетэ ваньмыз 10 егит авторъёс шедизы. Книгаен тодматон 30-тӥ куартолэзе Удмурт кун филармониын ортчиз.

Кызьы шуиз журналистъёслы Богдан Анфиногенов, та бичет огшоры ӧвӧл, малы ке шуоно отчы Ижкарысь пӧртэм авторъёслэн пӧртэм кылбуръёссы пыризы. Альманахын удмурт но ӟуч кылын кылбуръёс артэ интыяськемын.

Туж-туж умой, приятно мыным, милемыз, удмурт кылын гожъясьёсыз, но отчы пыртӥзы шуыса, малы ке шуоно удмурт кылбурет но пыре Ижкар кылбуретэ. Со азьло кӧня ке валантэмгес вал, дыр. Али со егитъёслы, туала калыклы чылкак валамон, удмурт кылын но гожъяло шуыса, ӟуч кылын но, нокыӵе пӧртэмез ӧвӧл шуыса
Богдан Анфиногенов, удмурт кылбурчи

Кылбурчи верамъя, «Поэт Up» бичетэ солэн удмуртлык но Удмуртия сярысь ог 5–7 ужъёсыз пыртэмын. Ваньмыз соос ӟучомем удмуртъёслы сӥземын но ӟучо-удмурто кылын гожтэмын. Соин ик, кылбурчи малпамъя, ӟуч лыдӟисьёслэн кылбурлэсь пуштроссэ валанэн шугъяськонъёссы луыны кулэ ӧвӧл.

«Мынам трос кылбуръёсы ӟучо-удмурто кылын гожъямын, соин ик сыӵе шуг-секытъёс ӧвӧл, дыр, малы ке шуоно мынам кылбуръёсы сӥземын ӟучомем удмуртъёслы, карысь, шуом. Кылсярысь, соос мед учкозы кыллюкамысь кыӵе ке но кылъёс но валалозы кылбурме», — шуэ Богдан Анфиногенов.

Кылбурчи пусйиз, туала ӟуч кылбуръёсын антологиен ӵошатыса, Удмуртиысь поэтъёслэн бичетсы но сыӵе ик «крутой». Чурыт обложкаен потэм книга туж йӧно но чебер адӟиське, ватсаз Богдан Анфиногенов.

Анастасия Шумилова малпамъя, «Поэт Up» выллем бичетъёс Удмуртиысь литература понна бадӟым азинлык луо.

Со туж бадӟым азинлык огъя Удмуртиысь литературалы, малы ке шуоно ог-огмес лыдӟыса асьмеос кызьы ке но узырмиськом, мар ке но выльзэ басьтӥськом. Мон ачим Ижысь туж тунсыко авторъёсын тодматски, и мыным соос аслам творчествоям кыӵе ке но пытьы кельтӥзы ни шуыны луоз
Анастасия Шумилова, удмурт кылбурчи

Альманахын одӥг интыын улӥсь удмурт но ӟуч авторъёслэн кылбуръёссы огазеямын бере, туж тунсыко ӵошатыны, мар пӧртэмез соослэн Ижкар шоры учконазы, шуэ Анастасия Шумилова.

«Удмурт литератураын вань сыӵе сям, Иж — со кыӵе ке но мурт инты кылбурчиослы, гожъяськисьёслы. Кӧня ке со традиция воштӥське ни, тани Богданлэн но кылбуръёсаз. Литература воштӥське, мон малпасько, таӵе книгаос потэмъя, со воштӥськон эшшо но золгес мынэ но со умой пала мынэ», — лыдъя кылбурчи.

Аслаз кылбуръёсыз сярысь верано ке, Анастасия Шумилова туж яратэ кылъёсын но формаосын шудыны. Куке со чеберлыко амал бордын нимысьтыз ужано луэ, нош куке кылбур ас понназ озьы гожтӥське. Та выллем амалэн трос кылбурчиос гожъяло, соин ик мон солэн кылдытӥсез ӧвӧл, вераз Анастасия Шумилова.

Ӟуч литература мукет литератураысь басьяськиз, асьмеос ӟуч литература пыр ваньзэ басьтӥськом — вань со формаосты, вань со пуштросъёсты. Но мар тунсыко — кызьы со удмурт кылбурет музъем вылын копак мукет сямен пушъе
Анастасия Шумилова, удмурт кылбурчи

Ватсалом, «Поэт Up» альманахез кылдытон бордын Ижкарысь но Удмуртиысь туала кылбуретлэн «Поэт Up» штабез тырше. Радъясьёс чакламъя, бичетлэн выль люкетъёсыз ӝыны арлы одӥг пол потозы. Книгаез поттон понна коньдон краудфандинг амалэн люкаське.

Тодэ вайытом, 2017-тӥ арын Анастасия Шумиловалэн но эшшо ньыль удмурт кылбурчиослэн ужъёссы Россиысь калыкъёслэн кылбуретсылы сӥзем антологие шедизы.



Наверх
Вниз