100 лет государственности Удмуртии
Ижкар+10 °C
25 -тӥ куартолэзь 2020 Вордӥськон
16+

«Вино из одуванчиков» спектакльзэ возьматоз Глазкарысь «Парафраз» Россиысь пичи каръёсысь театръёслэн фестивалязы

  • 370
  • 0
Новороссийск / Россия
«Вино из одуванчиков» спектакльзэ возьматоз Глазкарысь «Парафраз» Россиысь пичи каръёсысь театръёслэн фестивалязы
Туспуктэм: vk.com (Театр "ПАРАФРАЗ" (Глазов)

4–11 инвожое Новроссийскын Россиысь пичи каръёсысь театръёслэн XVI фестивальзы ортче. 8-тӥ инвожое Глазкарысь «Парафраз» театр «Вино из одуванчиков» спектакльзэ возьматоз. Со сярысь ивортэ Глазкар администрацилэн пресс-службаез.

Рэй Брэдберилэн повестезъя трагикомической фантазиез пуктӥз театрлэн валтӥсь режиссёрез, Удмуртиысь искусство удысысь дано ужась Дамир Салимзянов. Отын США-ысь одӥгаз пичи карын 1928-тӥ арын куинь гужем толэзь ӵоже агай-вынъёслэн улэм-вылэмзы, соослэн ӵыжы-выжыосынызы, бускельёсынызы, эшъёсынызы, тодмоосынызы кусыпъёссы возьматэмын. 2016–2017 аръёсы сезонысь устоез драмая спектакль сямен со «Золотая маска» йӧскалык театр премилэн но фестивальлэн кузь лыдметаз пыриз.

Туэ фестивале Краснодар но Красноярск шаеръёсысь, Свердловск, Тамбов, Калининград, Омск, Саратов, Самара, Иваново, Ленинград улосвылъёсысь, Татарстанысь но Удмуртиысь 16 коллективъёс люкаськизы. Устооссэ спектаклъёсты быръёзы Россиысь театр удысысь тодмо адямиос но критикъёс, вормисьёс Москваын Нациослэн театрзылэн сцена вылаз шудозы. Таяз арын жюриен кивалтэ Россиысь калык артист Игорь Скляр.

Конкурс сяна, фестиваль улсын дышетон программа чакламын. Пыриськисьёс понна семинаръёс, мастер-классъёс но тренингъёс радъяськозы.

2013-тӥ арын Пятигорскын ортчем фестивальын «Парафраз» театр «Короли и капуста» спектаклез понна гран-при басьтӥз но сӥзьыл сое Москваын Нациослэн театрзылэн сцена вылаз возьматӥз.

Ватсалом, 18-тӥ инвожое Глазкарысь «Парафраз» Тольяттиын туала драматургилы сӥзем «Премьера одной репетиции» IX театр фестивалез усьтоз. Отын «Дуры мы, дуры» спектакльзэс возьматозы. 



Наверх
Вниз