Ижкар+22 °C
3 -тӥ пӧсьтолэзь 2020 Удмуртарня
16+

«Удмуртия» издательстволэн книгаез Россиысь 50 устоосыз книгаос пӧлы шедьыны быгатоз

  • 443
  • 0
Москва / Россия
«Удмуртия» издательстволэн книгаез Россиысь 50 устоосыз книгаос пӧлы шедьыны быгатоз
Туспуктэм: vk.com (Удмуртия Книжное-Издательство)

«Удмуртия» издательстволэн одӥгез книгаез Россиысь 50 устоосыз книгаос пӧлы шедьыны быгатоз. Книгапоттоннилэн ужез конкурслэн номинатъёсыз пӧлы пыртэмын. Со сярысь ивортодэтъя «Удмуртия» агентстволы издательстволэн валтӥсь редакторез Георгий Грязев вераз.

Солэн кылъёсызъя, Удмуртиысь книгалэн «Россиысь устоосыз 50 книгаос» конкурслэн номинантъёсыз пӧлы шедемез сярысь Москваын «Красная площадь» фестивальысен тодмо луиз. Со сярысь издательствоын ужасьёслы Россиысь книгапоттӥсьёслэн огазеяськонзылэн тӧроез Константин Чеченев ивортӥз. Но йылпумъянъёс лэсьтытозь валтӥсь редактор книгалэсь нимзэ уг шарая.

Ваньмыз йылпумъянъёс лэсьтэмын луозы толэзь — толэзь но ӝыны ортчыса. Но ми тодӥськом, нырысь со огъя списокын вал, табере шорт-листын милям одӥгез книгамы пыремын. <…> Али отын нюръяськон мынэ, малы ке шуоно туж золэсь книгаос сётэмын. Вормем потэ, валамон. Соин ик син медаз усьы, кызьы шуо удмуртъёс
Георгий Грязев, «Удмуртия» издательстволэн валтӥсь редакторез

Кызьы шуиз валтӥсь редактор, «Удмуртия» издательстволэсь азинскемзэ Россиысь книгапоттӥсьёслэн огазеяськонзылэн ӧтчамазы но пусйизы. Ужрад «Красная площадь» фестиваль улсын ик радъяськиз.

«Мукет йӧскалык издательствоос пӧлын ог-огместы умой тодӥськом бере, ми шораз ик ӧвӧл, дыр. Ӧжыт, оло, вылланьгес, дыр, ӝутскемын. Съезд отын ортчиз Россиысь книгапоттӥсьёслэн огазеяськонзылэн, тӥни отын верамын вал, «Удмуртия» азинске шуыса, вань мае адӟытыны шуыса», — вераз Георгий Грязев.

Со пусйиз, фестивале туэ ваем ужъёсты кылем арен ӵошатыса учконо ке, книгаос «ӝыны йырлы вылӥгес ӝутскемын». Туннэ нуналлы книга — со огшоры лыдӟон гинэ ӧвӧл, со кузьман но данъяськон арберилы пӧрме ни, шуэ валтӥсь редактор.

Нырысетӥ интыын сое лыдӟон сылэ на, но сое сутэ ни книгаез чеберъян, сое возьматон, пушсэ усьтон. Кыӵе ке со кузьмаськон, чеберъяськон манерез но азьпалагес потыны кутске ни. Сое адӟиськод книгалэн вылтусызъя но, солэн зӧкталаезъя но, солэн туспуктэмъёсызъя но, суредъёсызъя но, чеберман амалъёсызъя но
Георгий Грязев, «Удмуртия» издательстволэн валтӥсь редакторез

Георгий Грязев верамъя, котьку сямен ик, «Красная площадь» книга фестивале «Удмуртия» издательство элькунэн, удмурт калыкен но солэн историеныз герӟаськем книгаосты нуиз.

Ми учкиськомы, кытын книгаосын вераське удмурт калыклэн историез сярысь, калык сямъёс, йылолъёс, калык лулчеберет, удмурт сиён но выжыкылъёс. Та тематикая книгаосмы ваньмыз милям одӥг-кык нунал куспын, пӧсь табань но перепеч кадь, кошкизы
Георгий Грязев, «Удмуртия» издательстволэн валтӥсь редакторез

Со ватсаз, книга басьтӥсьёс пӧлын туж пӧртэм адямиос вал шуыса, но котькудӥз сямен ик Удмуртиен яке удмуртъёсын герӟаськемын.

«Адямиос туж тунсыкоесь лыкто. Лыкто, кинъёс уло Москваын. Туж бадӟым тау верам потэ (Москваысь удмурт - ред.) землячестволы, солэн ёзчиосызлы. Соос юри лыктӥзы арня нуналэ быдэс семьяен. Лыктӥзы, учкизы, тунсыкъяськизы, книгаос басьтӥзы. Соос ог-огзылы смс но гожтӥллям, удмурт книгаос Горд площадьын шуыса, лыктэ», — шуэ Георгий Грязев.

Со сяна, книга басьтӥсьёс пӧлын удмурт кылэз дышетӥсь муртъёс но вал. Кылсярысь, одӥгез соос пӧлысь кылем арын ӟуч-удмурт кыллюкам басьтэм вылэм, нош туэ удмурт кылын книгалы лыктэм.

«Озьы ик лыкто соос но, кинъёс кызьы ке но герӟаськемын Удмурт шаерен, шуом, кузпалыз Удмуртиысь вал. Ветлӥз Семён Самсоновлэн ӵыжы-выжыезлэн кышноез. Кемалась, пе, ӧвӧл ни кузпалыз, но ачиз улэ Москваын. Лыктӥз ми доры, вераськиз. Солэн сюлэмыз Удмуртиен герӟаськемын. Со туж шумпотымон», - шуэ книгапоттоннилэн валтӥсь редакторез.

Тодэ вайытом, 31-тӥ куартолэзьысен 3-тӥ инвожоозь ортчем «Красная Площадь» фестивале «Удмуртия» книгапоттонни туэ куинетӥзэ пыриськиз ни. Таяз радэ издательство удмурт но ӟуч кылын поттэм 70 пала  книгаоссэ Москвае нуллӥз.

Ватсалом, 2017-тӥ арын «Удмуртия» издательстволэн куинь книгаосыз Росси вожвылъяськонъёслэн вормисьёсыз пӧлы шедизы. 



Наверх
Вниз