Ижкар-1 °C
27 южтолэзь 2019 Вирнунал
16+

Гынлэсь, басмалэсь, пластиклэсь лэсьтэм сюлэсь трос мунёос вуизы Ижкаре пинал дырлы сӥзем адӟытонэ

  • 334
  • 0
Ижкар / Удмуртия
Гынлэсь, басмалэсь, пластиклэсь лэсьтэм сюлэсь трос мунёос вуизы Ижкаре пинал дырлы сӥзем адӟытонэ
Туспуктэм: Майя Бывальцева

7-тӥ инвожое Ижкарысь адӟытонъёсъя «Галерея» центрын мунёосын возьматон ужаны кутскиз. Ужъюртлэн «Мунё сезонъёс» ӵектосэз улсын радъям адӟытон Удмуртиысь, Казаньысь, Оренбургысь, Пермьысь, Екатеринбургысь, Челябинскысь, Тулаысь усточиослэсь сюлэсь трос ужъёссэс огазеяз. Туэ ужрад пинал дырлы сӥземын.

Адӟытонэ пӧртэм амалъёсын но пӧртэм материалъёслэсь лэсьтэм ужъёс поттэмын. Басма, пӧсь но кезьыт пластик, фарфор, фаянс, папье-маше, гын усточиослэн киосазы синмаськымон ужъёслы пӧрмо. Адӟытон кӧня ке темаосъя люкемын: выжыкылысь нюлэс, совето вакытысь школа, шудон азбар, фантастической лулосъёс...

«Мунё сезонъёс» Ижкарын

15 фото

Котькуд мунёез рос-прос учконо ке, адӟытонын быдэс нуналэз ортчытыны луоз. Паймыто туж зэмлыко лэсьтэм тусъёс, выросъёс, дӥськут люкетъёс. Пичи но бадӟым мунёос пӧлын зэмзэ но нылпи вакытад берытскиськод кадь. Соосын вераськем, вешам потэ.

Дэри черкогуртысь Лилия Байкова папье-машелэсь пӧйшуръёссэ ваиз. Соос аслыз гинэ тупась амалэн лэсьтэмын

Таиз выль-выль ик амал, таӵе амалэн лэсьтӥсьёсыз ӧй на пумита ай асьме палан но, Москвае но нуллӥ ини вал таӵе амалэн. Талэн йырыз папье-маше, отчы пуктэмын ворсаськись, кыньылӥськись мунё синъёс. Вот соос выдо ке, соослэн синзы кыниське, султытӥськод ке — усьтӥське. <…> Мон ваньзэ ачим малпасько, суредасько — весь, мар йыре лыктэ, сое ик лэсьтӥсько
Лилия Байкова, мунё лэсьтӥсь

Лилия Байкова Дэриысь школаын ватсаса тодон-валанъёс сётӥсь дышетӥсь луыса ужа. Та удысэ сое мунёосын тунсыкъяськонэз вуттӥз. 1–8 классъёсын дышетскисьёсты со вуриськыны, шудонъёс лэсьтыны дышетэ.

«Уже мынам — пиналъёсыз дышетыны, нош таиз — хобби. Хобби сётӥз профессия. Мынам образование — зооинженер но социальный педагог, художественной образование мынам ӧвӧл нокыӵе но», — шуэ усточи.

Ижкарысь Эльза Гонина мунёос лэсьтон борды басьтӥськиз кык ар талэсь азьло, киужлы усточиос доры мастер-классъёсы ветлыса дышетске. Мунёосты туж яратӥсько, шуэ нылаш. Кыӵе ке нимысьтыз ӧрез ӧз бырйы на, али пӧртэмъёссэ эскере. Адӟытонэ солэн ньыль ужъёсыз поттэмын, син шоры нырысь ик йӧтэ «Волкодав» киноя пластиклэсь лэсьтэм мунёез. Дышетӥсеныз ӵош со бордын кык ар ужазы.

Сое ми лэсьтӥмы фотографиосысь — со Александр Бухаров актёр. Мон яратӥсько адямиез лэсьтыны. <…> Али мон лэсьтӥсько Гамораез — со «Стражи Глактики» американской киноысь, Marvel киноез. Атайме лэсьтӥсько но Джейн Эйр киноысь персонажез — мистер Рочестерез
Эльза Гонина, мунё лэсьтӥсь

Валамон, та мунёос шудон понна лэсьтэмын ӧвӧл. Соос корка пушез чебертӥсь, мылкыд сётӥсь арбериос луо. Нялтас вераса, дуно луись арбериос.

Адӟытон толэзь ӵоже ужамез улсын «Галерея» центрын мунё лэсьтонъя мастер-классъёс радъяськозы.

Чаклам арлыд: 0+ 

Наши партнеры

Наверх
Вниз