10 сюрслэсь трос адями люкаськиз Удмуртиын «Гербер» элькун празднике

Тулыс бусы ужъёсты йылпумъянэз пусйизы Удмуртиын 16-тӥ инвожое. Ува ёросысь Пекшур гурт вӧзысь возь вылэ элькун Гербере туэ 10 сюрслэсь трос адями вуиз.

Праздниклэн валтӥсь темаез луизы воршудъёс. Герберез сӥё-дано усьтон ужрадын ӵапак воршудэз утись мумыос калыкез пумитазы — Жикья, Можга, Вамья, Тукля, Ӟумья, Пельга, Чунча.

Люкаськем калыкез тулыс бусы ужъёсты быдэстэмен ӟечкылазы, но умой бусьтыр ю-нянь октыны сӥзизы элькун но ёрос кивалтӥсьёс.

Улосвыл кивалтэтлэн тӧроез Ярослав Семёнов пусйиз, куазь ужъёсты ӝегатӥз ке но, гуртоос кизёнзэс умой быдэстӥзы. Табере вань кужымез сое утялтон вакытлы дасяно. «Нош туннэ шулдыръяськоно, макем яркыт луоз та праздник, сокем удалтоз ю-нянь», — шуиз со.

Валтӥсез — со мылкыд, кудӥныз лыкто быдэс элькунысь но бускель улосвылъёсысь адямиос. Лыкто ӵошен шумпотыны, вераськыны. Котькуд ар выль кусыпъёс герӟасько, выль эшъёс кылдо. Со дыре ик та праздник дыръя ми валаськомы: трос дыр ортчыса но удмурт калык аслэсьтыз кылзэ, аслэсьтыз лулчеберетсэ утьыны быгатӥз, соосты дунъя, соосын данъяське но быдэс дуннелы возьматэ

Озьы ик со пусйиз, элькун тӧрлыкъёс лэсьто ваньзэ, гуртын улон мед азинскоз шуыса: со коньдонэз юрттэт но, сюресъёс лэсьтон но, интернет пыртон но. Ярослав Семёновлэн кылъёсызъя, таяз арын 200-лэсь трос гуртъёсы но черкогуртъёсы интернет вуоз.

Сяме пыӵамъя, праздникын усто ужасьёсты пусйизы. Муниципал кылдытэтъёслэн гурт возёсъёсты тулыс бусы ужъёслы дасянъя вожвылъяськонзылы йылпумъянъёсъя вормисе потӥзы Алнаш но Вавож ёросъёс, кыкетӥ инты басьтӥз Можга ёрос, куинетӥ — Вотка ёрос.

Озьы ик устооссэ трактористъёсты сӥлы каризы. Ӵошатсконын вормисьёс пӧлын Михаил Кольцов (Сьӧлта ёросысь «Батыр» огазеяськон), Александр Анточ (Дэри ёросысь Азин нимо огазеяськон), Рудольф Балобанов (Эгра ёросысь «Рассвет» огазеяськон), Константин Потапов (Дэри ёросысь «Путь Ильича» огазеяськон), Анатолий Паушев (Сюмси ёросысь «Нива» колхоз) но Алексей Березин (Ува ёросысь «Свобода» гурт возёс). Ваньзы соос Удмуртилэн тӧроезлэсь таукаронъёс но коньдонкузьым басьтӥзы.

13 фото

Котьку сямен, шулдыр мылкыд кузьмазы творчествоя коллективъёс, ужазы чеберлыко киужъёсъя адӟытон-вузкарон, мастер-классъёс.

Ватсалом, 1-тӥ пӧсьтолэзе «Гербер» шулдыръяськон Москваын ортчоз.