Эктонъя «Мост» калыккуспо лагерь ужаны кутскиз Удмуртиын

Удмуртиын Эктонъя «Мост» XV калыккуспо лагерь ужаны кутскиз. Туннэ, 22-тӥ инвожое, Ижкарын Калык творчествоя элькун юртын «Чебеляй» удмурт коллектив, Эстониысь «Каякас» ансамбль но Румыниысь «Сазлабу» мадьяр коллектив ӵошен репетицизэс ортчытӥзы.

Кызьы вераз ивортодэтъя «Удмуртия» агентстволы Калык эктонъя «Чебеляй» студилэн кивалтӥсез Наталья Чиркова, «Мост» ӵектослэн валтӥсь ужпумез — пӧртэм кунъёсысь эктӥсь егитъёсты огазеян.

Куке ми турист луыса мукет кунэ мынӥськом, ми ум тодӥське калыклэсь лулзэ. Нош репетициос, ӵошен программаос, ветлонъёс, ужрадъёс пыр соос тодо. Тани туннэ нырысетӥ репетиция, и ми адӟиськом, кызьы соос ог-огзэсты пумитало, кыӵе мылкыд. И со шоры сыӵе шумпотымон учкыны, куке тон коллективлэн кивалтӥсез. Выль куноос, выль эшъёс — соос соку ик огазеясько

Трос пӧртэм эктонъёс пӧлысь егитъёс калык эктонэз мед быръёзы шуыса, Румыниысь «Сазлабу» Мадьяр коллективлэн кивалтӥсьёсыз Имола но Эндре Вираг пиналъёслы йӧскалык лулчеберетэз пыӵатыны тыршо. Эктыны дышетон азьын коллективлэн ёзчиосыз кырӟанъёс но шудонъёс пыр тодматско но ог-огенызы кусып юнмато.

Пичи нылпиосыз нырысь ик эктыны ум дышетӥське, нырысь шудӥськом, кырӟаськом, выжыкылъёс вераськом ӵошен, дышетӥськом, кызьы ӵош улыны, группаен кызьы, мар улыны. Собере гинэ эктыны кутскиськом

Эндре Вираг пусъе, ваньмыз семья бордысен кутске, соин ик пиналъёслэн анай-атайёссы но ас лулчеберетсэс туж яратыны кулэ. Оло, пинал уг но яраты кырӟаны но эктыны, но адӟе ке, анай-атаез сое яратэ шуыса, соку пиналъёс но капчигес мыно ни эктыны-шудыны, шуиз коллективен кивалтӥсь.

Имола Вираг ватсаз, пичи эктӥсьёс, бадӟымъёсызлэсь адӟем карыса, эктон быгатонлыксэс эшшо но умоятыны тыршо.

«Венгер эктонъёсты капчи ӧвӧл дышетыны, соос шугесь, эшшо ик пиослы. Соослэн сыӵе виртуозной шуыны луэ эктонзы. Кин умойгес эктэ ни, соос шоры умой учко, пичиосыз учко паймыса: «Осто, кыӵе со умой быгатэ, мынам но сыӵе потэ луэме». Тӥни сыӵе мотивация соослэн. Озьы дышето, озьы капчигес», — лыдъя «Сазлабу» коллективлэн кивалтӥсез.

Нош вань сыӵеосыз егитъёс, кинэ йӧскалык эктон борды сюлэмзы кыске. Одӥгез соос пӧлысь Удмурт кун университетын дышетскись но «Чебеляй» студиын эктӥсь Светлана Зайцева. Нылаш калык эктонъя коллективын ньыль ар ни. 

Мон бырйи калык эктонэз, малы ке шуоно со мыным матысьгес, дыр, луэ, малы ке шуоно азьло пересьёс, мынам анай-атайёсы, ӵыжы-выжые — ваньзы же со удмурт. Нош мон асме чылк-чылк удмурт малпасько. Мынам со анай йӧлын пыӵамын, дыр, со яратон, кудӥз ӵапак калык эктонъёслы

Тодэ вайытом, «Мост» калыккуспо лагерь Удмуртиын 22–28 инвожое ортчоз. 23-тӥ инвожое вань мылкы карисьёсты Ижкарысь Киров нимо парке лагерез сӥё-дано усьтон ужрадэ возьмало. 24-тӥ инвожое коллективъёс Удмуртилэн шоркарысьтыз тымет дурын «Эшъяськон выж» праздник радъялозы. Озьы ик эктӥсьёс Удмуртилэн пӧртэм ёросъёсаз концертъёсын но калык эктонъя мастер-классъёсын вуылозы. Дышетон ужрадъёс элькунысь эктонъя коллективъёслэн кивалтӥсьёссы понна но ортчозы.

Ватсалом, ӵектос Россилэн азьмуртэзлэн фондысьтыз грант утэмен валче быдэстӥське. Лагерез радъяны озьы ик «Удмурт Кенеш» огазеяськон но Кузебай Герд нимо йӧскалык гимназия юртто.