Ижкар+1 °C
13 -тӥ оштолэзь 2021 Пуксён
18+

«Горинча» выль альбомез потӥз MORT нимын удмурт рэп кырӟасьлэн

  • 1044
  • 0
Ижкар / Удмуртия
«Горинча» выль альбомез потӥз MORT нимын удмурт рэп кырӟасьлэн
Туспуктэм: vk.com (Элькуновидение2017)

MORT нимын удмурт рэп кырӟась (Алексей Пикулев) «Горинча» нимо выль альбомзэ поттӥз. Отчы 10 кырӟанъёсыз пыризы. 

Кызьы вераз ивортодэтъя «Удмуртия» агентстволы ачиз кырӟась, горинча — со пичи дырысьтыз тодэ кылем шудон, отын нылпиос асьсэлы шудон корка лэсьто, асьсэлы ӧнер быръё. Огкылын вераса, бадӟымъёслэн улонзылы укшась улонэн шудо.

Валтӥсь «Горинча» нимо кырӟан пыр мон вераны тырши, будыса но адямиос ваньзы пыро шуыса улонлэн шудоназ, кытын кинэн ке малпамын ни шонер улыны косӥсь кыӵе ке куронъёс. Нош соосты ӧд ке чакла, тон шудонысь потод но нокинлы кулэ уд луы ни. Та ик луэ альбомлэн валтӥсь проблемаез, ку выжиськод бадӟым улонэ но кылдо пӧртэм малпанъёс но сюлэмшугъяськонъёс
Алексей Пикулев, удмурт рэп кырӟась

Алексей Пикулев верамъя, та альбомез туж кема но туж секытэн вордӥськиз. Малпамын вал, отын 8 кырӟанлэсь ӧжыт медаз луы шуыса. Озьы ик котькуд кырӟан аспӧртэмлыко но висъяськись мед луоз —пӧртэм стилен но чузъяськонэн, валэктэ автор.

«Шуыны луоз, котькуд кырӟан мукет крезьгур жанръёслы но кельшись луыны турттэмын, но озьы ке но, одно ик со кыле рэп кырӟан удмурт кылын. Таин валлин ик секыт вал альбомлэсь быдэслыксэ возьыны но чакланы, огшоры пӧртэм кырӟанъёсын люкам бичетлы медаз кельшы шуыса. Но малпасько, котькуд кырӟан мыным ӧскем потымонозь акыльтӥз ке но, 9 толэзь куспын лэсьтэм альбом пӧрмиз», — лыдъя кырӟась.

Нялтас вераса, «Горинча» альбоме Алексей Пикулевлэн огназ быдэстэм кырӟанъёсыз сяна, куинь дуэтъёс но пыризы — Оля Ипатоваен, Иван Белослудцевен но Элиза Гайнутдиноваен. Ӵошен кырӟан понна адями быръёнэз крезьгурась туж тунсыкоен лыдъя.

Мон малпамъя, котькуд пыриськись адями кулэ маин ке аспӧртэмлыко луыны, озьы ик со кулэ луыны удмурт эстрадае шер потась яке воксё удмурт кылзӥсьлы тодмотэм луыны. Аспӧртэмлыко эксперимент
Алексей Пикулев, удмурт рэп кырӟась

Алексей Пикулевлэн верамезъя, Ипатоваен но Белослудцевен ӵош ужамез вал ни ке, Гайнутдиноваен соос тодмо ик ӧй вал. Алексей удмурт йӧскалык театрын крезьгуръя режиссёр луыса ужа бере, одӥгаз концертын солэсь куаразэ кылыса, мерлыко вотэсбамъёсысьтыз кырӟанъёссэ кылзӥськиз. Соку ик рэпер валаз, та нылаш одно ик выль альбомаз пыриськыны кулэ шуыса.

Герӟаськи соин, но со соку ик соглаш шуиз, вераса но ӧй вутты вал ай, ачиз дэмлаз ӵош кыӵе ке уж лэсьтыны. Ачиз бигер, удмурт кылэз уг тоды, соин секытгес вал произношениен, но, малпасько, азьланяз ужам на ке, вольытгес пӧрмоз ни
Алексей Пикулев, удмурт рэп кырӟась

«Горинча» альбомез понна Алексей Пикулев тау каре ваньмызлы, кин юрттӥз сое кылдытыны, озьы ик, вань кылзӥсьёсызлы.  

Ватсалом, Алексей Пикулевлэсь выль альбомзэ татысь кылзыны луэ. 



Наверх
Вниз