Ижкар+1 °C
13 -тӥ оштолэзь 2021 Пуксён
18+

Кубыз фестиваль ортчоз Ижкарын пӧсьтолэзе

  • 662
  • 0
Ижкар / Удмуртия
Кубыз фестиваль ортчоз Ижкарын пӧсьтолэзе
Туспуктэм: Григорий Фомин

12–26 пӧсьтолэзе Ижкарын вашкала удмурт керзьгуро инструментлы — кубызлы сӥзем нырысетӥез фестиваль ортчоз. Со улсын тодосчиосын кенешонъёс, мастер-классъёс, концертъёс ортчытыны чакламын. Ивортодэтъя «Удмуртия» агентстволы со сярысь вераз фестивалез валтӥсь радъясь Елена Петрова (Дарали Лели).

Кубыз сярысь ӧжыт тодӥськом. Крезез кадь ик потэ сое калыке вуттэм, тросгес со сярысь мед тодозы. Мед со системаын уже кызьы ке но калык дорозь вуттэмын луоз, шуом, пичи кубызчи-пияшъёс мед дышетскозы ини кубызэн шудыны. Оло, азьланяз Удмурт культурая центрын сыӵе луоз луонлык, оло, кыӵе ке музыкальной школа бордын
Дарали Лели, Кубыз фестивалез валтӥсь радъясь

Дарали Лели верамъя, кубызэн вашкала сямен шудон амалъёс Татарстанын улӥсь удмуртъёслэн гинэ кылемын на вал. Кылем даурысь 90-тӥ аръёсы соосын тодматскиз мадьяр тодосчи Миклош Дэметэр. Соин пумиськылэм кубызчиос пӧлысь туннэ Михаил Романов гинэ вань на, фестивале со но лыктоз. Йылпумъян концертын соос кыназы вашкала шудон амалъёсты возьматозы.

Кубызлэсь туала сцена вылын кутӥськемзэ возьматозы «Айкай» театрысь Павел Камашев но Эграысь Калыкъёслэн эшъяськон юртысьтызы Лия но Дмитрий Лекомцевъёс. Вашкала инструментэз ас сяменыз чузъяськытоз Чудья Жени.

Возьматыны, милям крезьгур потенциалмы зол, кужмо шуыса, милям вань пӧртэм удмурт крезьгуро тӥрлыкъёсмы но со удмурт крезьгурмес узырмытыны вань пӧртэм пумо луонлыкъёс, туала крезьгурез но быгатӥськом кубызэн чеберматыны но вот кызьы со кубыз туала вакытэ чузъяськысал. Одӥг ужпум — вашкала традициез адӟон, мукетыз — кубызэз туала крезьгуре пыртон
Дарали Лели, Кубыз фестивалез валтӥсь радъясь

Кубыз фестивальлэн ужанрадлыказ:

12-тӥ пӧсьтолэзе 18 час 30 минутэ «Арт-резиденциын» (К. Маркс урам, 258) мадьяр этнографлэн, кубызэн шудӥсьлэн Миклош Дэметэрлэн (Трансильвания, Румыния) фотоадӟытонэз. Ватка сьӧрын улӥсь удмуртъёс доры этнографи экспедициен потамез сярысь лекция. Ижкарысь туала группаосын концерт-пумиськон. 

17-тӥ пӧсьтолэзе 18 час 30 минутэ «Грифон» центрын (Пушкинской урам, 268) пиналъёс понна шудонъёсын но эктонъёсын программа ужалоз. Со сяна, Миклош Дэметэрен но Анастасии Дэметэр-Петроваен лэсьтэм шудонъёсын но чеберъяськонъёсын адӟытон-вузкарон радъяськоз.

19-тӥ пӧсьтолэзе 18 час 30 минутэ кар ӵектосъёсъя «Лифт» штабын (Пушкинской урам, 216) кубызэн шудонэз азинтонлы сӥзем котырес ӝӧк ортчоз. Ужрадэ Удмуртиысь но бускель элькунъёсысь валтӥсь крезьгурасьёс но калык крезьгурез эскерисьёс пыриськозы. 

26-тӥ пӧсьтолэзе 15 часын Чеберлыко киужъёсъя элькун центрын (В. Сивков урам, 173) Чудья Женилэн кубызэн шудонъя асдышетонэныз тодматон ортчоз. Миклош Дэметэр кубызэн шудонъя мастер-класс нуоз. Калык инструментъёсты лэсьтӥсьёс, крезен но мукет инструментъёсын шудӥсьёс но кутскисьёс понна ужрад.

26-тӥ пӧсьтолэзе 19 часын (Киров нимо паркысь фан-зонаын) кубызлы сӥзем бадӟым концерт ортчоз. Ужрадэ кубызэн вашкала но тула сямен шудӥсь усточиос пыриськозы: Михаил Романов (Татарстан), Павел Камашев, Лия но Дмитрий Лекомцевъёс, «Эктон корка студиысь» артистъёс, Чудья Жени («Дукес» группаен но post-dukes ӵектосэн) но мукетъёсыз. Усьтэм площадкаын эктон ӝыт.

Фестивальлэн вань ужрадъёсаз эркын пырыны луэ.

Чаклам арлыд: 0+



Наверх
Вниз