Ижкар+1 °C
13 -тӥ оштолэзь 2021 Пуксён
18+

Кубызчи Миклош Дэметэр: кубыз нырысь ик Удмуртиын мед улӟоз

  • 790
  • 0
Ижкар / Удмуртия
Кубызчи Миклош Дэметэр: кубыз нырысь ик Удмуртиын мед улӟоз
Туспуктэм: Наталья Еркешева

Мадьяр этнографлэн, кубызчилэн, туспуктӥсьлэн, кылчилэн Миклош Дэметэрлэн «Кубызлэн шаераз» адӟытонэз Ижкарын нырысетӥзэ Кубыз фестивалез усьтӥз. Ужрад Удмуртилэн шоркарысьтыз Арт-резиденциын 12-тӥ пӧсьтолэзе ортчиз. 

Кубыз – удмуртъёслэн вугыен сиё крезьгуро инструментсы. Соин шудон йылолъёс кылем даур пумын Татарстанысь но но Марий Элысь куд-ог ёросъёсын гинэ кылемын на вылэм. Адӟытонын пӧртэм аръёсы отысь кубызчиос доры потам экспедициосысь туспуктэмъёс возьматэмын. Кызьы вераз мадьяр этнограф ивортодэтъя «Удмуртия» агентстволы, нырысетӥосыз 1999-тӥ арын Анастасия кузпалыныз ӵош нырысетӥ эскеронъёсазы потан дыръя лэсьтэмын. 

Та адӟытонлэн кык люкетэз, луоз вераны. Тани коридорын ошемын кубызчиосын, кубызэн герӟаськем туспуктэмъёс. Кыкетӥез люкетэз — со удмурт сямъёсын, инкуазен, портретъёс. Со сыӵегес люкетэз выставкалэн. Мае мон адӟи камера пыр, сое адӟем луоз али тани татын
Миклош Дэметэр, мадьяр кубызчи, этнограф

Солэн кылъёсызъя, удмурт лулчеберетэн тунсыкъяськон вуоно кузпалыныз Анастасияен тодматскемез бере кутскиз. Со дырозь этнографлэн мукет калыкъёслэсь шуланъёссэс лэсьтылэмез вал ни, соин ик удмуртъёслэсь но та выллем крезьгуро инструментсэс утчаз.

Мынам туж потэ вал шедьтэме удмурт шуласьёсыз. Татчы (Удмуртие – ред.) трос пол ветлӥм но, мон юалляськи, тырши со сярысь тодыны, но ӧвӧл, пе, уг шудо шуланэн. Мон пайми, кызьы озьы буш киын бертод Удмуртиысь. Но кылӥ, кубызчиос вань на, кӧня ке пересь адямиос. Соку ик малпан лыктӥз соос доры ветлыны и соосыз учкыны, гожъяны. Со ужез Настяен ӵош лэсьтӥм вал 1999-тӥ арысен кутскыса
Миклош Дэметэр, мадьяр кубызчи, этнограф

Соку, 19 ар талэсь азьло, эскерисез туж паймытӥзы вашкала манерен шудӥсь кубызчиос. Туж жаль потӥз, ваньмыз со быроз шуыса, малы ке шуоно крезьгурасьёсты рос-прос нокин ӧз эскеры, соослэсь шудэмзэс трос ик ӧз гожъялэ. Туж потэ вал, со улэп мед кылёз шуыса, вера Миклош Дэметэр. Соин ик этнограф та ужез кутскиз но али но азьланьтэ на.

Кызьы ми тодӥськом, берпуметӥез кубызчи — со Миша агай (Михаил Романов – ред.) Татарстанысь Балтась ёросысь. Али Казаньын улэ со. Мон сое гинэ тодӥсько на. Эшшо потэ сое гожъяме. Но со сяна, мукетъёсыз кошкемын ни, кызьы мон тодӥсько
Миклош Дэметэр, мадьяр кубызчи, этнограф

«Кубызлэн шаераз» адӟытон

7 фото

Кубызчи малпамъя, удмурт калык крезьгуро инструментэз утён понна туннэ кӧня ке пумо уж нуиськыны кулэ. Нырысетӥез — кубызэн вашкала гуръёсты шудыны дышетон. Тодонлык луиз ке, инструментэн лобыса, эрико шудыны луоз, лыдъя Миклош Дэметэр. Кыкетӥез вамыш — кубызэн туала манерен шудон.

Вань сыӵе мылкыд, туалагес манерен кубызэн шудыны, пыртыны модерн, группаос мед шудозы. Соиз но туж умой, но нырысетӥ вамышез мон ӧй кельтысал
Миклош Дэметэр, мадьяр кубызчи, этнограф

Этнограф пусъе, тужгес валтӥсез — кубыз Удмуртиын мед улӟоз. Румыниын улыса но Миклошлэн семьяез отын улӥсьёсты удмурт лулчеберетэн тодматыны тырше. Трансильваниын ортчись ужрадъёсын соос удмурт но, мадьяр но палзэс возьмато. Отын одно ик кубызэн но шудо. Нош 2011-тӥ арын Удмуртие бертылыкузы, кубызчи татын но крезьгурез вӧлмытонъя эшъёс шедьтӥз.

Туж шумпотӥсько, ми бертӥм 2011-тӥ арын но пытьы кельтыны быгатӥм кадь татын. Тани кубыз лэсьтӥсьёс вань ни кӧня ке, соос пӧлын матысь эшъёс но. Алёша Кузнецов нырысь кутскиз кадь кубыз лэсьтыны. Соин ӵош ми шудӥм «Эктон коркаын» но. Соин ик оскон вань, соос азьланьтыны быгатозы
Миклош Дэметер, мадьяр кубызчи, этнограф

Азьланяз Миклош Дэметэрлэн кубызъя дышетон книга гожтыны мылкыдыз вань. Жаляса верано, ваньмызлы дыр уг тырмы, но оскон вань, толалтэ вакытъёсы книга гожтыны ваньмо шуыса, вера кубызчи.

Тодэ вайытом, 12-26 пӧсьтолэзе Ижкарын Кубыз фестиваль улсын тодосчиосын кенешонъёс, мастер-классъёс, концертъёс ортчытыны чакламын.



Наверх
Вниз