Ижкар+1 °C
13 -тӥ оштолэзь 2021 Пуксён
18+

Кубызэн шудыны дышетӥсь книгаен тодматӥзы Ижкарын

  • 406
  • 0
Ижкар / Удмуртия
Кубызэн шудыны дышетӥсь книгаен тодматӥзы Ижкарын
Туспуктэм: Наталья Еркешева

Туннэ, 26-тӥ пӧсьтолэзе, Кубыз фестиваль улсын Ижкарысь Чеберлыко киужъёсъя элькун юртын Чудья Жени (Евгений Бикузин) кубызэн шудыны дышетӥсь книгаеныз тодматӥз.

Кызьы шуиз автор ивортодэтъя «Удмуртия» агентстволэн корреспондентэзлы, книга бордын со ӝыны ар пала тыршиз. Со куартолэзе 30 экземплярен потӥз, отчы крезьгуро инструментлэн историез сярысь веран но Удмуртиысь пӧртэм ёросъёсын но Бигерын улӥсь удмуртъёслэн 15 крезьгурзы пыризы.

Кубызэн дышетскыны секыт, нокыӵе теория материалъёс ӧвӧл дышетскон понна. Вот мугез вал сыӵе. Отын пичияк ваньмыз вань: кӧня ке историез, кызьы сое кутоно, кызьы соин кутсконо шудыны. Озьыен адями, кудӥзлэн ноку но кубызэз кутылэмез ӧвӧл, со книгая быгатоз дышыны. Отын валэктэмын, кызьы, кытчыяз зӥбоно
Чудья Жени, кубызчи

Кубызчи пусъе, инструментэн шудыны дышон понна крезьгурез кылыны кулэ, малы ке шуоно кубызын, гитараен ӵошатоно ке, ладъёсыз ӧвӧл. Озьы ке но, Чудья Женилэн чакламезъя, одӥгез тодмоез час куспын тужгес капчи крезьгурез шудыны быгатӥз.

Мон экспериментъёс кари вал тодмоосы вылын. Вань одӥг тодмое, кудӥзлэн воксё крезьгур кылонэз ӧвӧл, но со быгатӥз кутскыны соин шудыны. Со одӥг час пукиз но нырысетӥзэ капчи крезьгурез быгатэ вал шедьтыны
Чудья Жени, кубызчи

Нялтас вераса, та крезьгуро инструментэн Чудья Жени ог 8 ар талэсь азьвыл тунсыкъяськыны кутскиз, куке «Чипчирган» ансамбле лыктӥз. Соку коллективын шудӥсь кубызчиос солы быдэн кык крезьгурен возьматӥзы, озьы шудыны дышетскиз. Нош али со Чеберлыко киужъёсъя элькун юртын ужа но кубызъёс лэсьтэ.

Пырак заказъёс ӧвӧл. Мон огшоры лэсьтӥсько, мынам дась кубызэ луэ, собере адями сюре сое басьтыны. кема уг кылльы кубыз татын, со соку ик басьтӥське
Чудья Жени, кубызчи

Чудья Жени верамъя, кубызэн шудыны дышетӥсь книгаез Удмуртиысь, Самара улосвылысь, Татарстанысь но Москваысь ог куать адями басьтӥз ни. Озьы ик ужен Удмурт кун университетлэн лыдӟетъюртаз но Пичи Пурга ёрос лыдӟиськонниын тодматскыны луоз.

Тодэ вайытом, Кубыз фестивалез Ижкарын 12 пӧсьтолэзе мадьяр этнографлэн, кубызчилэн, кылчилэн Миклош Дэметэрлэн «Кубызлэн шаераз» адӟытонэз усьтӥз. Туннэ, 26-тӥ пӧсьтолэзе, фестиваль бадӟым концертэн йылпумъяськоз.



Наверх
Вниз