Ижкар+1 °C
13 -тӥ оштолэзь 2021 Пуксён
18+

Кубызчи Михаил Романов: кубызэн шудыны лушкем дышетски

  • 400
  • 0
Ижкар / Удмуртия
Кубызчи Михаил Романов: кубызэн шудыны лушкем дышетски
Туспуктэм: Наталья Еркешева

26-тӥ пӧсьтолэзе Ижкарын удмурт крезьгуро инструментлы сӥзем Кубыз фестиваль йылпумъяськиз. Ужрадлэн берпуметӥ нуналаз Казаньысь Удмуртие берпуметӥез вашкала сямъя шудӥсь кубызчи Михаил Романов ветлӥз. Крезьгурчиен пумиськон Чеберлыко киужъёсъя элькун юртын ортчиз.

Кызьы вераз люкаськемъёслы Михаил Романов, со вож нуны дыръяз ик атаезтэк кылиз, нош кубызэн шудыны атаезлэсь кылем инструментэн дышетскиз.

И вот мон сое шудыны турттӥсько, шудыны уг быгатӥськы. Бускель Микаль агайлэсь учкыса, каллен-каллен, мырдэм-мырдэм, кызьы настроить каре, кызьы шудэ со отын. Милям бакча сьӧрын отын шур вань, нюлэс вань, уллань гоп дурынгес отын писпуос вань. Куддыръя отчы васькыса, шудыса курадӟисько вал. <…> Кер потӥсько, нокин медаз адӟы. Только огнам шып-шып каллен гинэ дышетскисько
Михаил Романов, кубызчи

Солэн кылъёсызъя, ог тямыс арес дыръяз со кубызэн ӧжытак шудыны дышиз. Дышетсконъяз атаезлэн кубызэз вужмыса пырдӥз но, пияшлы бускелезлэсь, Микаль агайлэсь, кылем инструментсэ кузьмазы. Михаил Романов нырысь ик Балтаси ёросысь удмуртъёслэсь ӝӧк сьӧрын кырӟан гурзэс шудылӥз, пумен апай эктон гурез но мукет крезьгуръёсты дышетӥз.

Со вераны гинэ озьы, нош со аръёс ортчо. Вераськод – озьы, озьы этапно, нош со этап минутэн, часэн, нуналэн ӧвӧл, толэзьёс, аръёс ортчо
Михаил Романов, кубызчи

16 аресаз Михаил Романов нырысьсэ сюанэ мынӥз. Азьвыл та праздник кубыз чузъяськытэк уг ортчы вылэм. Нош али удмурт сюанъёсын та инструментэз уд кылы ни – яке техника шудэ, яке баян, шуэ кубызчи. Сюанын берпуметӥзэ кубызэн шудӥз ог 15 ар талэсь азьвыл Балтаси ёросысь Ушма вордскем гуртаз.

Пусъём, Михаил Романов атаезлэн но бускелезлэн киосынызы лэсьтэм кубызъёсын шудыны дышетскиз, нош та дыре 1994-тӥ аръёс котырын басьтэм скрипкаез кубыз карыса шудэ. 

Тодэ вайытом, Кубыз фестиваль Ижкарын 12-тӥ пӧсьтолэзе мадьяр кубызчи, этнограф, кылчи Миклош Дэметэрлэн «Кубызлэн шаерез» адӟытонэн кутскиз. Озьы ик фестиваль улсын Чудья Женилэн кубызэн шудыны дышетӥсь книгаеныз тодматӥзы. Кык арня кыстӥськись ужрад бадӟым концертэн йылпумъяськиз.



Наверх
Вниз