Ижкар+1 °C
13 -тӥ оштолэзь 2021 Пуксён
18+

«Брангуртысь песянайёс» Санкт-Петербургын Гербер шулдыръяськонын нимысьтыз ӧтем куноос луизы

  • 597
  • 0
Санкт-Петербург / Россия
«Брангуртысь песянайёс» Санкт-Петербургын Гербер шулдыръяськонын нимысьтыз ӧтем куноос луизы
Туспуктэм: vk.com (Дмитрий Корепанов)

28-тӥ пӧсьтолэзе Санкт-Петербургысь «Озеро Долгое» паркын нырысьсэ ортчем «Гербер» шулдыръяськонлэн нимысьтыз ӧтем куноосыз луизы «Брангуртысь песянайёс». Со сярысь «ВКонтакте» вотэсбамаз ивортэ Удмуртиысь Калыкъёслэн эшъяськон юртысьтызы режиссёр, Невалэн ярдуръёсаз праздникез пуктӥсь Дмитрий Корепанов. 

Ивортодэтъя «Удмуртия» агентстволы со вераз, нунал ӵоже празднике 3 сюрс пала адями вуылӥз шуыса. 

Гербер - 2018 Санкт-Петербургын

8 фото

Дмитрий Корепановлэн ивортэмезъя, празднике Удмуртиысь, Москваысь но Башкириысь творчествоя коллективъёс вуизы. Чеберлыко киужъёсъя элькун центрысь но Санкт-Петербургысь кибашлыос синпельёсын адӟытон-вузкарон радъязы. Петербургысь удмуртъёс пӧртэм мастер-классъёс ортчытӥзы, нош сцена вылын усто концерт мынӥз, отчы яркыт, аспӧртэм коллективъёс пыриськизы.

Озьы ик удмурт шӧмо туала дӥськутъёсты возьматӥзы. Егитъёсты «Эктоника» ӵектос шулдыртӥз.

Гербер праздник Питер музъем вылын гудыртӥз но Санкт-Петербургын улӥсьёслэн тодэ ваёнъёсазы кемалы кылёз. Мар бен, гажано эшъёс, вераны луэ, Гербер праздник Россиысь каръёстӥ вамышъя но трос йӧслыко Россиез аспӧртэм удмурт лулчеберетэн тодматэ. Гербер Санкт-Петербургын луоз! <…> Дан удмурт калыкмылы но асьме лулчеберетмылы
Дмитрий Корепанов, Удмуртиысь Калыкъёслэн эшъяськон юртысьтызы режиссёр

Кызьы вераз ивортодэтъя «Удмуртия» агентстволы «Удмурт Кенеш» огазеяськонлэн Санкт-Петербургысь но Ленинград улосвылысь ёзэтэзлэн кивалтӥсез Татьяна Серебренникова, дурбасьтӥсьёс луизы ке, «Гербер» шулдыръяськонэз Невалэн ярдуръёсаз вуоно арын но ортчытыны малпало.


«Гербер» шулдыръяськонэз Россилэн уйпал шоркараз ортчытыны кичӧлтон сётӥз «Удмурт Кенеш» огазеяськонлэн Санкт-Петербургысь но Ленинград улосвылысь ёзэтэз, радъяны юрттӥзы Санкт-Петербургысь Йӧслыкъёсъя юрт, Удмуртиысь Йӧскалык политикая министерство, Калыкъёслэн эшъяськон юртсы.

Тодэ вайытом, 22-тӥ пӧсьтолэзе «Гербер» праздник ньылетӥ ползэ Москваын ортчиз. 



Наверх
Вниз