Ижкар+1 °C
13 -тӥ оштолэзь 2021 Пуксён
18+

Выль емышъёсын вузкарон, вӧсям ӝук но узыр шулдыръяськон программа: кызьы пусйизы Можгаын «Выль» элькун праздникез

  • 517
  • 0
Можга / Удмуртия
Выль емышъёсын вузкарон, вӧсям ӝук но узыр шулдыръяськон программа: кызьы пусйизы Можгаын «Выль» элькун праздникез
Туспуктэм: Григорий Фомин

4-тӥ гудырикошконэ Можгаын 15-тӥ ползэ ни выль емышъёслы сӥзем «Выль» удмурт йӧскалык элькун праздник ортчиз. Сюги шур дуре  пӧртэм ёросъёсысь куноос люкаськизы: кин бакча сиёнъёссэ, йӧлзэ-вӧйзэ, сӥльзэ но чечызэ вузаны, кин вожвылъяськонъёсы пыриськыны, кин выль кеньырлэсь вӧсям ӝук сиыны.

«Выль» элькун шулдыръяськон Можгаын


Пичи Пурга черкогуртысь муш вордӥсьёс Леонид но Любовь Герасимовъёс адӟытон-вузкаронэ выль чечызэс ваизы.

Милям бичамын со котькытысь но: вань сяськаысез но, вань тросгес беризьысь но тани. Вань югытэз но, вань пеймытэз но. Фацелия но кизиськом, донник но кизиськом. Отын куштӥськем бусыос вань пасекаямы, со пасека дорын туж трос кипрей но будэ, эмезь но, пустырник но. Вань сяськаосысь со
Любовь Герасимова, муш вордӥсь

Герасимовъёслэн семьязы, чечыен сяна, «Выле» керттӥськемъёсын но чеберъяськонъёсын лыктӥз. Киужен Любовь Герасимова толалтэ выре: сумкаос керттэ но йӧл пакетъёслэсь лэсьтэ, чыртывесьёс но йыркерттэтъёс кылдытэ. 

Чечы вузаськомы но, пумен милесьтым куро: налобники кулэ, шуо. Собере ми лэсьтӥськом ни
Любовь Герасимова, муш вордӥсь

Бакча сиён будэтӥсьёслэн но туэ емышсы удалтэмын. Нимысьтыз висъяны уг луы, ваньмыз ӟеч будэмын, шуэ ивортодэтъя «Удмуртия» агентстволы Можга ёросысь Кватчи гуртысь «Заря» колхоз-возёслэн технологез Анна Егорова. Солэн кылъёсызъя, туэ агрономъёссы нырысьсэ помидор будэтыны кутскизы, бакча сиёнзы туж удалтӥз.

Кылем арын тани помидормы ӧй вал на. Туэ нырысетӥ арзэ ми будэтӥськом помидор. Агрономмы Ирина Германовна туэ нырысетӥзэ будэтӥз помидор. Помидорез туж удалтӥз, спросэз вань
Анна Егорова, «Заря» колхоз-возёслэн технологез

Выль емышлы сӥзем празднике «Удмурт Кенеш» огазеяськонлэн тӧроез, Кун Кенешысь тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез  депутат Татьяна Ишматова но лыктӥз. Солэн кылъёсызъя, «Выль» шулдыръяськон – со гужем ужлы йылпумъянъёс лэсьтон но гуртоослы тау карыны луонлык.

Туж шумпотӥсько, куке асьмеос Гербер бере нош пумиськиськом но учкиськом ини, кыӵе куазь милемлы удалтӥз-а, ӧз-а, шуом, кыӵе сиён-юонъёсмы пӧрмизы. Шумпотыны, тау карыны нырысь ик быгатӥськом ужасьёсмылы, кудъёсыз гужем ӵоже, быдэс гужем ӵоже ужазы, ваньзэ будэтӥзы
Татьяна Ишматова, «Удмурт Кенеш» огазеяськонлэн тӧроез, Кун Кенешысь ялан ужась ӧрилэн кивалтӥсез

Пусъём, шулдыръяськонэ трос егитъёс но люкаськизы. Кин ке соос пӧлысь эшъёсыныз пумиськыны, вожвылъяськонъёсы пыриськыны вуиз, нош куд-огез удмурт сям-йылолъёсын тодматскыны.

«Выль» шулдыръяськон улсын Можга карын нылпиослы «Кӧжыпогъёс» площадка ужаз, егитъёс быдэ вуонлы сӥзем интерактив шудонэ пыриськизы, семья паръёс «Азвесь сюрло» вожвылъяськонын юн кусыпъёссэс возьматӥзы. Вань мылкыд карисьёс праздникын радъям ярмаркаысь Удмуртилэн пӧртэм ёросъёсысьтыз фермеръёслэсь вузъёссэс басьтыны быгатӥзы.



Наверх
Вниз