Ижкар+1 °C
13 -тӥ оштолэзь 2021 Пуксён
18+

Вить удмурт гожъясьёслэн ужъёссы Россиысь калыкъёслэн нылпи литературая антологиязы пыризы

  • 710
  • 0
Ижкар / Удмуртия
Вить удмурт гожъясьёслэн ужъёссы Россиысь калыкъёслэн нылпи литературая антологиязы пыризы
Туспуктэм: apmcur.ru

Туннэ, 28-тӥ гудырикошконэ, Ижкарын Нылпи литературая антологиен тодматон ортчиз. Книга Россиысь 201 авторлэсь 55 йӧскалык кылъёсын гожтэм но ӟуч кылэ берыктэм произведениоссэс огазеяз. Антологие вить удмурт гожъясьёслэн – Алексей Ельцовлэн, Римма Игнатьевалэн, Ульфат Бадретдиновлэн, Владимир Михайловлэн но Лия Малыхлэн ужъёссы пыризы.

Кызьы шуиз ивортодэтъя «Удмуртия» агентстволэн корреспондентэзлы Алексей Ельцов, Нылпи литературая антологие солэн куать кылбуръёсыз сюризы. Нимысьтыз ӧри соосты 20 ыстэм ужъёс пӧлысь бырйиз. Ваньмыз ик произведениос пӧртэм темалы сӥземын, малы ке шуоно кылбурчилэн гожъяськон мылкыдыз но пӧртэм учыръёсысь кылдэ.

Калык пӧлы потаса, адямиос ӵектыса, собере улонысь басьтӥсько. Тани нырысь нылпиосылы сӥзьыса гожтӥсько вал, нылпиослэн вераськемысьтызы мар ке но тунсыкозэ шедьтыса. Собере внукъёс потӥзы, внукъёслэн вераськонысьтызы тумошо, тунсыко учыръёсты. Тӥни озьы азьланьтӥське. Собере ноку уг вуны <…> пинал дыр. Котькӧня арес лу, весь нылпи дыръяд луылэм учыръёс йырын бергало. Тӥни озьы гожъяськон кылдэ, со паськыта но таӵе антологиосы пыре
Алексей Ельцов, удмурт гожъясь

Гожъясь верамъя, та книгалэн ӟечлыкез но пуштросэз юн. Озьы ке но сюлэмшугъяськытӥсез но вань – антология 1 сюрс 500 лыдын гинэ потэмын, соин ик вань мылкыд карисьёслы та книга уз тырмы, шуэ Алексей Ельцов. Нош та книга Россиысь калыкъёсын но соослэн литератураенызы тодматскыны туж умой луонлык.

Тани асьмелэн 130-лэсь ятыр кылъёс ке азинско, со пӧлысь 55-ез татчы пыремын. Учке ай, мар быдӟа со кужым! Со Россиен данъяськон. Адями шедьтоз отысь аслэсьтыз геройзэ, аслыз кельшись кылбур яке верос шедьтоз, ассэ со геройёсын артэ пуктоз, будоз соосын ӵош, ачиз но, оло, гожъяськыны кутскоз. Пиналъёс понна но со, дышетӥсьёс понна но, анай-атайёс понна но. Со туж бадӟым уж
Алексей Ельцов, удмурт гожъясь

Ульфат Бадретдинов пусъе, та антология – со история ни, со дауръёслы кылёз, малы ке шуоно со умой, чебер бумагаен, чурыт вылбамен поттэмын. Книгае гожъясьлэн кык веросэз пыриз: «Мар луоз ӵуказе?» но «Шайтан-гурезь».

«Мар луоз ӵуказе?» мынам книгае но вань ӵапак со веросэн. Сое мон гожтӥ ни вал кемалась, куке Гожъясьёслэн огазеяськоназы пыртэмын ӧй вал ай. Пичи дырысьтым учырез басьтыса, сое кӧня ке воштыса, мукетгес карыса, мон (гожтӥ – ред.). Со малпаськытӥсь верос. <…> «Шайтан-гурезь» «Миша» журналын но Москваын печатласькиз ӟуч кылын Анатолий Демьяновлэн берыктэмезъя
Ульфат Бадретдинов, удмурт гожъяськись

Гожъясь малпамъя, котькуд лыдӟись Нылпи литературая антологиысь выль тодон-валанъёс басьтоз. Кылсярысь, пӧртэм калыкысь гожъясьёсын тунсыкъяськисьёс асьсэ понна пусъёзы, мар гожъя соиз яке мукетыз калык. Кин ке но бускель йӧслыкъёслэн литературазылы саклык висъялоз, нош куд-огез воксё тодмотэм калык сярысь тодоз, шуэ Ульфат Бадретдинов.

Котькуд калыклэн аслаз дунне шоры учконэз. <…> Со произведение пыре, малы ке шуоно котькуд гожъясь гожтэ аслэсьтыз улонзэ, аслэсьтыз адӟемзэ, аслэсьтыз кылэмзэ. Со фантазировать кариз ке но, все равно со аслаз синъёсыныз адӟемзэ гожтэ. Со ласянь сое эскерыны кулэ на, лыдӟыны, ӵошатыны
Ульфат Бадретдинов, удмурт гожъясь

Тодэ вайытом, Россиысь калыкъёслэн кылбуретсылы сӥзем антологие вить удмурт кылбурчиослэн ужъёссы шедизы. Таиз бичет кылем арын потӥз. 



Наверх
Вниз